Igoeraren erronka asteburuan hasiko du Munttarpek
Munttarperen gizonen taldeak Euskal Ligara igotzeko fasea hasiko du asteburuan. Ligaxka jokatzen hasiko da Gipuzkoako hiru talde eta Bizkaiko beste birekin.
Asteburuan hasiko du igoera ligaxka Munttarpek. Euskal Ligan jokatzeko aukera borrokatzen hasiko da Munttarpe Eskubaloi Klubaren gizonen taldea asteburuan. Igoera fasea hasiko dute lezoarrek, beste bost talderekin: Legazpi, Soraluze-Bergara eta Urnieta gipuzkoarrak,; eta Askartza (Leioa) eta Escolapios (Bilbo) bizkaitarrak. Gipuzkoako Lehen Mailan liga izugarri ona egin ondoren, igoera izango da sasoiari zentzu osoa emango dion emaitza. Bihar (larunbata) dute igoera faseko lehen partida Legazpiren kantxan (Bikuña kiroldegian, 19:15ean). Gogotsu daude lezoarrak, ilusio handiarekin, nahiz eta azken orduko baja garrantzitsuren bat izan taldean, lesioagatik.
Gipuzkoako Lehen Mailako Ligan, bai Legazpi, Sorazule-Bergara eta Urnieta taldearen kontrako partida guztiak, etxean eta kanpoan, irabazi ditu Munttarpek. Beraz, talde horiek zehatz ezagutzeaz gain, aurrekariak baikorrak dira. Bizkaiko taldeekin, ordea, zalantza. Ez dute haien datu oso zehatzik Munttarpekoek, baina ziur dakitena da arerio latzak izango direla.
Esana dago sei taldeko igoera fasea dela. Denek denen artean partida bakarrerako ligaxka jokatuko dute (joaneko partidak daude bakarrik, bueltakorik ez), beraz, ligaxkan bost partida jokatu beharko ditu Munttarpek, kontrario bakoitzarekin bana, hiru etxean eta bi kanpoan (Legazpi eta Askartzaren kontra). Ligaxka horretan lehena denak lortuko du zuzenean Euskal Ligara igotzeko lehen plaza, eta azkena, kanporatua geldituko da. 2 eta 5 postuen artean daudenek, berriz, ‘final four’ erako lehia jokatuko dute ligaxka bukatzen denean, eta hortik irabazle ateratzen denak lortuko du Euskal Ligarako bigarren tokia. Beraz, Munttarpek bi aukera ditu mailaz igotzeko: ligaxka irabazi, eta hori lortzen ez badu, ‘final four’ delakoa irabazi. Lehen ligaxkan azkenak izatea, hau da, kanporatuta gelditzea, ez dago lezoarren planen artean.
Emakumeak, Kopan
Munttarperen emakumeen taldeak ligako lanak bukatu ditu. Azken jardunaldietan Euskal Ligarako igoera fasean aritu ziren lezoarrak, baina koska bat gorago egiteko aukera joan egin zitzaien. Ez dute lortu mailaz igotzea. Beraz, orain, Gipuzkoako Kopan murgilduko dira.
Herrialdeko Kopako bigarren taldean daude lezoarrak, Irauli Bosteko, Usurbil, Bera Bera eta Eibar taldeekin batera. Lehen jardunaldiko partida bihar (larunbata) dute, 16:00etan eta Errenteriako Galtzarabordako kiroldegian, Irauli Bostekoren kontra.
