Jose Luis Ansorena hil da
Gaur hil da musikaren sustapenean lan izugarri handia egindako errenteriarra, 90 urte zituela. Besteak beste, Andra Mari Abesbatza eta Eresbil sortu zituen.
Jose Luis Ansorena Miranda. Jose Luis Ansorena Miranda musikagile, musika ikerlari eta sortzaile errenteriarra gaur arratsaldean hil da. Donostian jaio zen 1928ko maiatzaren 2an. 1966an Errenteriako Kaputxinoen komunitatera heldu zenean 38 urte zituen Ansorenak. Ordurako sortua zuen Iruñean San Antonio eskolania, eta gazteekin lan garrantzitsua egina zuen. Urte hartan bertan, Gaztedi, parrokiako gazte taldea sortu zuen. Ondoren heldu zen Andra Mari abesbatza. Orereta eta Oinarri abesbatzak ere berak sortu zituen Andra Mariren barruan, baita Karnaba otxotea biziberritu, eta Alaia emakumeen otxotea sortu.
1973an sortu zuen Musikaste, Jon Baguesek iazko maiatzaren 2an egin zitzaion aitortzan nabarmendu zuenez, “euskal musikaren iragana berreskuratzeko, eta 200 obra estreinatu ditu bertan”. Urtebete geroago sortu zuen Ansorenak Eresbil Euskal Musikaren Artxiboa. “Azken horrek 250.000 agiritik gora gordeta ditu, horietatik 30.000 partitura euskal konpositoreek sortuak dira”.
Euskal Herriko Txistularien Elkartea, abesbatzen federazioa eta euskal konpositoreen elkartearen sorkuntzak sustatu zituen Ansorenak, eta Eusko Ikaskuntzaren musika alorrean kolaboratu. Eskerrak eman zizkion ekitaldian Baguesek Ansorenari, “humanistikan zein musikan jasotako hezkuntza hezkuntza sendoak gizartearen zerbitzura jarri ditu Ansorenak. Gizarte nahasmen handiko uneetan borondateak eta ahotsak batzea lortu zuen, artearen edertasuna musikaren bidez lortuta. Hori guztiagatik, mila esker”.
Herriko fabrika batek libre utzi zuen orubeari Musika Plaza izena jartzea hark proposatu zuen. Iazko maiatzaren 2tik Jose Luis Ansorena Musika Plaza izena du. Egun hartakoa, eskertza eta aitortza ekitaldia izan zen, baita Ansorenak Errenteriari egindako ekarpen handiaren zati bat behintzat hari itzultzekoa ere.
Jarraian, iazko maiatzaren 2an Errenteria-Oreretan Ansorenari egin zitzaion herri aitortzaren irudiak ikus daitezke.
