Baliabide publikoak 'eraginkortasunez' eta 'arduraz' kudeatu direla dio udalak
Datu zehatzetara jota, %5 gutxitu da zorra, eta 2018an zehar %10eko aurrezki garbia sortu, hau da, 5.300.000 euro. Halaber, karga fiskal propioa murriztu da %1 zergetan eta %2 tasetan, beti ere udalak emandako datuen arabera.
Aurreko pleno baten irudia. 2018ko aurrekontuen likidazioaren berri eman zuen udalbatzak asteartean, eta ondorio batera heldu, “orain arte egindako finantza kudeaketak aukera eman du ekitaldia egoera ekonomiko onean eta aurrezki nabarmenarekin ixteko”. Betebehar onartuak 52.960.000 eurora igo direla eta horrek aurrekontuaren exekuzio maila %80koa izatea suposatzen duela azaldu du udalak, eta gaineratu, diruzaintzako soberakinetik txertatu diren zazpi milioiak, beste %10 gehituko litzaiokeela exekuzio maila horri..
Likidazioaren emaitzak 4.400.000 euroko soberakin likidoa utzi duela erantsi du gainera; “diru horrekin aurrekontuan aurreikusi ez ziren jarduketak burutzeko eta beharrei erantzuten jarraitzeko aukera izango du udalak”. Likidazioaren aurkezpena udalaren finantza sistemari buruzko laburpena egiteko baliatu dute, eta horretarako, Gipuzkoako Foru Aldundiak lurraldeko udalerri guztien likidazioetarako argitaratzen dituen adierazle ekonomikoak baliatu ditu. Adierazle horiek erakutsi dute udalaren esanetan, likidazioaren emaitza horiek lortu direla zorra murriztuta, aurrezki garbia sortuta eta karga fiskala gutxituta.
Datu zehatzetara jota, %5 gutxitu da zorra, eta 2018an zehar %10eko aurrezki garbia sortu, hau da, 5.300.000 euro. Halaber, karga fiskal propioa murriztu da %1 zergetan eta %2 tasetan, beti ere udalak emandako datuen arabera.
Datuok baliabide publikoak eraginkortasunez eta arduraz kudeatu direla erakusten dute udalaren esanetan, “eta horri esker itxi dela ekitaldia finantza egoera onean”.
