Elkarbizitzarako eta Gizarte Ekintzarako Kontseiluaren araudia behin betiko onartu du udalak
Arautegia onartzeko prozesua joan den ekainean jarri zuten martxan, eta arautegia behin betiko onartu ostean, kontseilua bera eratuko da orain.
Kontseilu berria martxan jarrita, bederatzi aholku kontseilu sektorial izango ditu udalak. Udalbatzak behin betiko onartu du Errenteriako Udaleko Elkarbizitzarako eta Gizarte Ekintzarako Kontseiluaren araudia. Arautegia onartzeko prozesua joan den ekainean jarri zuten martxan, eta arautegia behin betiko onartu ostean, kontseilua bera eratuko da orain. Errenteria-Oreretako gizarte ekintzako zein aniztasunaren alorreko eragileek, eta alorreko ordezkari politikoek eta teknikariek hartuko dute parte kontseilu horretan.
Helburua, berriz, udal politika publikoetan gizarte ekintza eta aniztasunaren gaineko aholkuak ematea izango da, baita koordinazio zuzena eta sistematizatua izatea eragileen eta udalaren artean. Horretarako, eragileak gonbidatuko dituzte lehen bilerara, eta bertako ordezkariek antolaketa, lehentasuna duten gaiak eta bestelakoak adostuko dituzte.
Behin betiko onartu aurretik, bitan egon da araudia jendaurrean, eta hainbat ekarpen jaso. Honakoarekin, bederatzi aholku kontseilu sektorial izango ditu udalak. Araudia Gipuzkoako Aldizkari Ofizialean argitaratzeko zain da eta laster sartuko da indarrean.
