Hiru final asteburuan Lezon
Herriko futboleko eta eskubaloiko gizonen taldeek, nahiz areto futboleko Jaixkik partida oso garrantzitsuak dituzte asteburuan etxean.
Allerruk Plazetan jokatuko du bihar. Kirol ligetan aro gorrian gaude. Sasoiak arrakastaz edo porrotean bukatuko diren definitzeko garaian. Asteburuan, Lezon hiru final daude. Futbolean, eskubaloian eta areto futbolean bana.
Futbolean, Allerruk Erregional Ohorezko Mailako 31. jardunaldiko partida jokatuko du bihar (larunbata) Plazetan. 16:00etan hasiko da Bergararen kontrako partida. Jaitsiera postu ofizialetatik, koska bakarra gora dago Allerru, eta ia deus ere jokoan duen Bergararen aurka irabazi beharra dauka, bai ala bai, maila mantentzeko azken esprintean, lau partidakoa, egoki kokatzeko. 12 puntu daude jokoan liga bukatu arte: denak lortuz gero, noski, jaitsieratik aske legoke Allerru. Oso zaila izango da puntuak hirunaka pilatzea, ordea. Finala da biharkoa, lau partidako azken txanpako finaletatik lehena.
Eskubaloian, Euskal Ligara igotzeko fasean da gizonen Munttarperen taldea. Bost partidako ligaxkako bigarrena dute etzi (igandea) 11:30ean Bekoerrotan, Bilboko Escolapiosen kontra. Itzuli bakarreko eta bost lehiako lehena joan den asteburuan irabazi zuen Munttarpek Legazpin (30-33), eta ongi haste horrek konfiantza eman behar die lezoarrei oso gutxi ezagutzen duten talde bizkaitarrari aurre egiteko. Igandean irabaziko balute, ondo bideratua lukete igoera fasea: batetik, Escolapios taldeak ere lehen jardunaldian irabazi zuelako; bestetik Munttarpe bi garaipenekin sailkapenaren aurrean jarriko litzatekeelako; eta azkenik ligaxkako gainontzeko hiru partidetatik hiru etxean dituelako. Baina edo arazo bat: garrantzi handiko bajak izango ditu taldeak igandean, hainbat arrazoirengatik.
Areto futbolekoa da hirugarren finala. Gipuzkoako Lehen Mailako hirugarren postuan da Jaixki AFT, 54 punturekin. Aurretik ditu Euskalduna bigarrena 55ekin, eta Orixe Tolosaldea 57rekin. Gaur du ligako azken aurreko partida Jaixkik, Bekoerrotan (21:50) sailkapenaren azpialdean, baina lasai dagoen Gure Txokoaren kontra. Lidergoari hozkada emateko gai izango al dira lezoarrak?
Jarraian, Lezoko asteburuko kirol talde nagusien partidak:
FUTBOLA
Gizonen Erregional Ohorezko Maila
- Allerru-Bergara, larunbatean, 16:00etan Plazetan.
Emakumeen Gorengo Maila, Kopa
- Axular-Allerru, igandean, 16:00etan Donostiako Puiuko zelaian.
Gizonen Gazteen Ohorezko Maila
- Astigarraga Mundarro-Allerru, larunbatean, 17:30ean, Astigarragako Zarkumendegi zelaian.
Gizonen Gazteen Lehen Maila, Kopa
- Allerru-Beti Ona, larunbatean, 18:00etan Plazetan.
ESKUBALOIA
Gizonen Euskal Ligarako Igoera Fasea
- Munttarpe-Escolapios, igandean, 11:30ean Bekoerrotan.
Emakumeen Gipuzkoako Kopa
- Munttarpe-Bera Bera, larunbatean, 18:00etan Bekoerrotan.
ARETO FUTBOLA
Gizonen Gipuzkoako Lehen Maila
- Jaixki AFT-Gure Txokoa, ostiralean (gaur) 21:50an Bekoerrotan.
- Idiazabal-Gaintxu AFT, ostiralean (gaur) 22:00etan Idiazabalgo Zelaa kiroldegian.
SASKIBALOIA
Gizonen Gipuzkoako Hirugarren Maila
- Zalburdi-Kurkubi, ostiralean (gaur) 19:30ean Debako kiroldegian.
