Itsasoan edo lehorrean, baina Oarsoaldean udan kirola
Uda kirol kanpainaren barruan, 3-16 adin tartekoek eta 16tik gorakoek 35 jardueraz gozatzeko aukera izango dute uda aroan.
Kirol zinegotziek Lezoko rokodromoan aurkeztu dute Uda 2019. Uda kanpainaren berri eman dute gaur Oarsoaldeko lau udaletako kirol zinegotziek. Orotara, 35 aukera izango dituzte Errenteria-Oreretako, Pasaiako, Oiartzungo eta Lezoko biztanleek udan ere kirolaz gozatzeko. Eskaintza, iaz bezala, adin guztietako lagunentzat zabaldu dute. Ekainaren 17tik irailaren 8ra arte zabalduko dira jarduerak, txandaka (12 txanda daude)
Jon Txasko (Errenteria-Orereta), Lore Suarez (Pasaia), Enekoitz Marcos (Oiartzun) eta Irlentz Ortega (Lezo) herri bakoitzeko Kirol zinegotziak izan dira Uda kanpainaren xehetasunak eman dituztenak, gaur goizean Lezoko Bekoerrota kiroldegian egin den agerraldian. Udalen arteko elkarlanetik, eskualdeko Kirol Mahaian, sortutakoa da Uda kanpaina, udal bakoitzak dituen errekurtsoen optimizazioan oinarrituta eta eskaintza zabala helburu. 3-16 adin tartekoentzat eskaintza, nahiz 16tik gorakoena prestatu dute. Hala, itsasoko eta lehorreko ekintzak izango dira.
Horietan izena emateko epea atzo (maiatzak 2) zabaldu zen. Izen emateen informazioa, eta Udaren kirol eskaintza osoaren herri bakoitzeko informazio euskarrien bidez (udal webguneak) edo banatuko diren 8.500 eskuorrietan dago. Horiek ikastetxeetan banatuko dituzte, eta tokian tokiko kirol instalazioetan eskuratzeko aukera dago.
Eskaintzan sakonduz, iaz abian jarritako nordic walking, Zirkua Kalean, eta paddle board jarduerak nabarmendu dituzte Kirol zinegotziek. Eta kanpaina udatiarra denez, herritarrak animatu dituzte batez ere itsasoarekin harremana duten jardueretan izena eman dezaten: bela, piraguismoa, arrauna, paddle surf eta urpekaritza. Hala, itsasoko jarduerak ingurune naturalean egiten direnez, Pasaiako badiaz gozatzeko aukera ere ematen dutela zabaldu dute udal ordezkariek, “badia beste perspektiba batetik ezagutu daiteke”. Bela jardueretan indar berezia jarri dute, esanaz beste herrietan arrakasta duen jarduera dela, eta kirola egiteaz gain, itsasoaren nahiz haizeen aldaeraren ezagutza izateko balio duela.
Udan kirolaz gozatzeko prestatu dute Uda 2019. Eta aldi berean osasuna hobetzeko eta ariketa fisikoa sustatzeko iniziatiba onuragarria dela adierazi dute Kirol zinegotziek.
Eskuorriak
Banatuko diren 8.500 eskuorrietan xehetasunez agertzen dira Uda 2018 kanpainaren barruan dauden kirol jarduera guztiak. Herriz herri agertzen da zer egin daitekeen, eta herri bakoitzeko jarduera zerrendan, horiek non diren, eta izena emateko zer egin behar den (telefono zenbakiak, prezioak, txandak eta bestelakoak) ageri dira.
