[Galeria] 10301 elkartasun hazi erein dituzte
Gaur amaituko dute sentsibilizazio lantzeko, eta elkartasuna biltzeko duela hilabete abiatu zuten kanpaina eta jaso duten erantzunarekin oso pozik azaldu da.
10301 Elkartasun Keinu iniziatibak bazkaria egin du sentsibilizazio hilabetea amaitzeko. Gaur amaituko du kanpaina 10301 Elkartasun Keinu Iniziatibak, eta pozik daude arduradunak. Pozik errefuxiatuen gaia lehen lerrora ekarri dutelako Oiartzunen, jendeak hitz egin duelako, sentsibilizatu, eta helbururik behinena hori zuten.
Nora Velez del Burgo Zalakain iniziatibako kidea da eta hilabeteko kanpainaren antolatzaileetako bat. Gaur amaituko dute sentsibilizazio lantzeko, eta elkartasuna biltzeko duela hilabete abiatu zuten kanpaina eta jaso duten erantzunarekin oso pozik azaldu da. “Bazkaltzera 228 sarrera saldu ditugu eta kontuan hartuta 3 urtetik beherako haurrek ez dutela sarrerarik erosten, lagun mordoa elkartu gara gaur Elorsoron”.
Antolatutako beste ekintzetan ere erantzuna oso ona izan dela nabarmendu du. Halako iniziatibak beharrezkoak diren zalantzarik ez du: “Ezinbesteko dira errefuxiatuen gaiaren inguruan jendearen kontzientzia pizteko”. Horrekin batera, beste helburua jarri zuen iniziatibak kanpaina hasitakoan, 10301 euro biltzea, oiartzuar bakoitzeko bat. Badirudi antolatzaileek azalduko dutenez hori ez dela beteko: “Zaila ikusten dugu iristea, gaur 3.000 eurotik gora ditugu bilduta, eta egunean zehar gehiago bilduko dugu, baina ez gara iritsiko 10301 eurora. Hori baino garrantzitsuagoa da, ordea, jendearengana iristea, eta hori lortu dugu, gaia egunerokotasunean atera dugu kalera dokumental bidez, hitzaldi bidez… eta gainera jende oso ezberdinarengana heldu gara, esparru ezberdinetan aritu gara. Hori da garrantzitsua”.
Bazkariaren ostean, Olarri dantza taldeko kideek Izaro eta Mikel Urdangarinen Errefuxiatuarena kantarekin dantza eskainiko dute, eta haien emanaldia amaituta, Malen eta Ekain arituko dira kantuan, baita Nabari taldea eta Endika ere. Arratsean berriz, 23:00etan jarraituko dute parranda Kataxulo Gaztetxean.
