Egitarau zabala Emakumeen etxean
Aste honetan bertan izango da lehenengoa, Emakumeak eta pentsioak mahai ingurua antolatu dute hilaren 9an 18:30ean hasita.
Emakumeen Etxean ate irekien jardunaldia egin zuteneko irudia. Emakumeen Etxeak egitarau zabala prestatu du hilabete honetan. Aste honetan bertan izango da lehenengoa, Emakumeak eta pentsioak mahai ingurua antolatu dute hilaren 9an 18:30ean hasita. Emakumeek beren lan ibilbidean zehar hartzen dituzten erabakiek pentsioetan zer eragin daukaten aztertuko dute eta pentsioetan ematen den genero arrakala azalduko dute, besteak beste. Gaia hiru ikuspegitik landuko dute: pentsiodunak, sindikatuak, eta gazteak.
Ikus-entzunezkoak hartuko du lekukoa hilaren 14an (asteartea), Zauria(k). Eromena. Gorputza. Feminismoak dokumentalaren proiekzioarekin. Ondoez psiko soziala eta genero bizipenak uztartzen dituen ikus-entzunezkoa da eta proiekzioaren ondoren eztabaidarako espazioa zabalduko dute. 19:00etan izango da. Azkenik, hilaren 30ean, ostegunarekin, Sorginlore Gizarte Elkartearen eskutik Komunikazioa feminismotik eraldatzen izeneko mahai-ingurua antolatu dute. Esperientzien elkartrukea eta hausnarketarako espazioa irekiko da. Hiru ikuspuntutatik jorratuko da gaia, ARTibismotik Laura Contresarekin; umoretik, Beatriz Egizabalekin; eta ikus-entzunezkoetatik, Maddi Castrorekin.
Hilabete honetan gainera, bi ikastaro berri hasiko dira, eta oraindik izena emateko epea zabalik dago. Autodefentsa feminista tailerra da bat. Tailerraren helburua erasoak identifikatzea eta indarkeria nola sortzen eta eraikitzen den aztertuko da. Era berean, mekanismoak eta ekintzak bilatuko dira eguneroko bizitzan jasaten diren eraso egoerei aurre egiteko. Ikastaroa, hilaren 11n izango da (larunbata) 10:00etatik 14:00etara eta 15:30etik 19:30era.
Desprintzesatze tailerra izango da bestea. Ikastaroaren iraupena 5 saiokoa izango da, hilaren 16tik (osteguna) ekainaren 13era bitartean ostegunetan 18:00etatik 20:00etara, gazteleraz. Ikastaroa, Faktoria Lilako Irantzu Varelak emango du.
Ikastaroak doakoak dira eta izena emateko bide ezberdinak daude: Zu! Zure Udala Arreta Zerbitzuan, internet bidez, edo emailez. Ikastaroez gain, Eskola Feministak bi talde eskaintzen ditu, urte osoan zehar zabalik daudenak: Indarkeria gabeko bizitzaren aldeko emakumeak; eta Emakume zaintzaileentzako topagunea. Gainera Azalean sexu aholkularitza zerbitzua eskaintzen da Emakumeen Etxean, hilabetearen bigarren ostegunean 18:00etatik 20:00etara.
Emakumeen Etxeak ateak zabalik ditu astelehen eta ostiraletan 09:00etatik 13:00etara eta asteartetik ostegunera, 16:00etatik 20:00etara. telefono zenbakia, honakoa: 943 449 630.
