EH Bilduk eskualderako proposamenak aurkeztu ditu
Oarsoaldeko lau alkategaiak elkartu dira San Markoko gotorlekuan egin duten agerraldian.
Mikel Arruti, Aizpea Otaegi, Jexux Leonet eta Junkal Mintegia, Lezo, Errenteria, Oiartzun eta Pasaiako alkategaiak, hurrenez hurren. “Eskualdeak aurrez aurre erronka handiak” dituela defendatuta EH Bilduren eskualdeko lau alkategaiek agerraldi bateratu bat egin dute gaur eguerdian San Markoko gotorlekuan, Oarsoalderako dituzten “proposamen adostuak” aurkezteko.
“Estrategia bateratu baten beharra” defendatu du denen izenean Errenteriako alkategai Aizpea Otaegik, eta “sinergiak” bilatuko dituztela agindu.
Lanerako lau ardatz dituztela jakinarazi dute: Garapen sozio ekonomikoa bultzatzeko politikak, politika sozialak, kultur politikak eta mugikortasunaren esparrukoak, eta atalez atal esku artean dituzte egitasmo garrantzitsuenak zerrendatu.
Batzuk nabarmentze arren, mugikortasunaren atalean EuskoTreneko trenbidea Pasaian eta Errenterian lurperatzeari buruzkoak aipatu dituzte; Kultur politiketan, ekimenen osagarritasuna bultzatu eta Errenteriako Atlantikaldia eta Pasaiako Itsas Festibalaren arteko lankidetza; Politika sozialetan, berdintasuna lehentasunezkotzat jo dute, eta sozio-ekonomian proiektuen dibertsifikazioa defendatu dute.
Aipamen berezia Portu Agintaritzari egin diote, “Portua eta udalerrien arteko harremana aldatzeko ahalegina” egingo dutela iragarriz, “Portuak herritarrei bizkar emateari utz diezaion”.
Gorteetako hauteskundeen “emaitzekin pozik”
Oiartzungo alkategai Jexux Leonetek Espainiako Gorteetarako hauteskundeen balorazio egin du, lortutako emaitzekin “oso gustura” daudela adieraziz. Leonetek Nabarmendu duenez, EH Bildu izan da indar politiko bozkatuena eskualdean, 10.000tik gora boto bildu dituztela ohartarazita.
Gaineratu duenez, “herritarren babesak hauspoa eman die maiatzaren 26ko erronkari aurre egiteko”, eta herriz herri zein eskualderako proiektu zehatzak dituztela goraipatuta, herritarren babesa eskatu eta eskertu du.
