Ez diote borrokatzeari utziko
Ez dute borrokatzeari uzteko asmorik, ez behintzat, aldarrikapen guztiak bete eta bermatzea lortzen duten arte. Izan ere, mobilizazio eta manifestazioak, kalera ateratzeak ahalbidetu die jubilatu eta pentsiodunei txikiak izangatik ere, hainbat lorpen eskuratzea.
1.080 euroko gutxieneko pentsioen aldarrikapena biseran, gaurko Duintasunaren elkarretaratzean. Kalean jarraituko dute. Ez dute borrokatzeari uzteko asmorik, ez behintzat, aldarrikapen guztiak bete eta bermatzea lortzen duten arte. Izan ere, mobilizazio eta manifestazioak, kalera ateratzeak ahalbidetu die jubilatu eta pentsiodunei txikiak izangatik ere, hainbat lorpen eskuratzea. Besteak beste, Espainiako Gobernuak pentsioak %1,6 igotzea 2018an, eta %1,8 2019an lortu zuten, “bataila txiki bat irabazi genuen”. Beren eskaerak lortu dituztela pentsatzea arriskutsua dela ohartarazi du gaur Duintasunak hileko lehen asteleheneko elkarretaratzean, “uste badugu lortu dugula eskatzen dugun hura, ez du zentzu handirik mobilizazioekin jarraitzeak, hori da Espainiako Gobernuak, zein autonomikoak nahi dutena, banatu eta mobilizazioak bertan behera utz ditzagun”.
Jubilatu eta pentsiodunen eskaerak bere horretan jarraitzen dutela gogorarazi dute, “Zapateroren (PSOE) 2011ko erreformak ekarritako murrizketak indarrean direlako, baita 2013ko Rajoyrenak ere (PP). gainera 2020an, ez badugu erremediorik jartzen, pentsioak %0,25 igoko dizkigute: ez gaitzatela engaina”.
Gogor salatu dute hauteskunde garaian, jubilatu eta pentsiodunak babesten dituztela dioten alderdiak, “inongo konpromiso errealik hartu gabe. Beren ordezkariak bidaltzen dituzte ekonomian adituak bailiran komunikabideetara pentsio sistema ez dela jasangarria esatera behin eta berriz, beren mezua sinetsi eta pentsio plan pribatuak egin ditzagun. Kapitalaren konplizeak dira, finantza taldeen konplizeak”.
Hamarnaka lagunek egin dute bat Duintasunaren elkarretaratze eta manifestazioarekin.
Gogora ekarri ditu, bestalde, legebiltzarrean EH Bilduk eta Podemosek pentsioen osagarrien gainean aurkeztu zuten mozioak atzera bota zituztela EAJ eta PSE-EEk. Beren aldarrikapenak ez direla aldatu nabarmendu du Duintasunak: 1.080 euroko gutxieneko pentsioak; 1.200 euroko gutxieneko Lanarteko Gutxieneko Soldata; pentsioen KPIaren araberako urteroko balio handitzea legez bermatzea; soldata eta pentsioen soldata arrakalarekin amaitzea; 2011 eta 2013 urtetako lan erreformak bertan behera uztea; botiken koordainketa eta medikamentazoa bertan behera uztea; euskal babes eta gizarte segurantza sistema publikoa sortzea.
Argi esan dute,”gobernuan dagoena dagoela, pentsioak babesten jarraituko dugu”. Elkarretaratzea amaitu eta manifestazioa hasi aurretik, deialdia egin dute Donostiara joateko larunbatean (hilak 11) bertan jubilatu eta pentsiodunek manifestazioa egingo dute Udal Hauteskundeetarako kanpaina hasi eta hurrengo egunean. Helburua, pentsio duinen gaia eta pentsiodunak alderdien agenda politikoan lehen lerroan izatea. Berdin egin zuten Espainiako Gorteetarako hauteskunde kanpaina hasi eta hurrengo egunean Hego Euskal Herriko lau hiriburuetan.
