Izaskun Gomez: "Bi aukera baino ez daude, EH Bildurekin atzera egitea edo PSE-EErekin aurrera egiten jarraitzea"
Idoia Mendia Pasaian izan da PSE-EEren alkategaiari babesa eskaintzen
Izaskun Gomez, Denis Itxaso, Idoia Mendia, Eneko Andueza, Marisol Garmendia eta Iñaki Arriola Trintxerpeko pasarelan. PSE-EEk udal hauteskundeei begirako ekitaldia egin zuen atzo Pasaian, biziberritzearen ikur bihurtzen ari den Herrera eta Trintxerpe arteko igarobidean. Han izan zen egungo alkate et PSE-EEren alkategai Izaskun Gomez, eta ondoan, besteak beste, Ahaldun Nagusirako hautagai Denits Itxaso eta alderdiaren idazkari nagusi Idoia Mendia izan zituen, babesa erakutsiz.
Izaskun Gomezek hala esan zien hautesleei: “Bi aukera baino ez daude, EH Bilduren atzera egitea, edota PSE-EErekin aurrera egiten jarraitzea”. Gomezen arabera, “EH Bildu iragana eta konponduezina” ordezkatzen dituen bitartean, “PSE-EEren eskaintza etorkizuna eta aurrerapena” dira.
Gomezen iritziz “EH Bilduren kudeaketa negargarria” izan zen, eta aldiz, PSE-EE gobernuan egon den denboran, “beste giro bat arnasteaz gain, Pasaiak etorkizuna ez ezik oraina duela frogatu du”.
Ekitaldi berean Ahaldun Nagusirako hautagai Denis Itxasok esan zuen “PSE-EE erakundeetan egon izan ez balitz biziberritzea ez zela martxan egongo”, eta bide horretan “asko egiteko” dagoela aitortuta, PSE-EEk prozesu horren gidaritzan jarraitzea beharrezkoa dela defendatu zuen. “Guk behartu dugu aldundia udalerri honi begira ziezaion. Justizia ariketa bat izan da” defendatu zuen.
Ildo beretik mintzo zen Idoia Mendia: “Lasaitasuna eta egonkortasuna itzuli nahi diogu udalerri honi. Gaur, Pasaia, Izaskunen eskutik harro begiratzen dio bere buruari”, eta “bizitzeko udalerri aproposa ez ezik, erreferente turistiko eta kultural bat” dela defendatu zuen Albaola eta Itsas Festibala aipatuz.
