Mantxester Txikia adierazpen askatasunaren alde
Gara egunkariaren elkartasun eta babes batzordeak 175 harpidedun berri lortu nahi ditu egunkari horren espolioaren aurkako dinamikaren barruan. Errenteria-Oreretako Juan Manuel Cabada artistaren eskultura bat zozkatuko dute.
Juna Manuel Cabada artista eskultura eskutan duela, Gararen elkartasun eta babes batzordeko kideekin. Errenteria-Oreretako Gara egunkariaren elkartasun eta babes batzordeak agerraldia egin zuen atzo Foru plazan duen lokalean. Gararen espolioaren aurkako dinamikan lanean hasi eta helburu bat jarri zutela azaldu zuten atzoko agerraldian, “nazio mailan 60.000 harpidedun berri lortzea da erronka, Oreretara ekarrita, 175 harpidedun berri behar ditugu aurre egin ahal izateko”. Erronka horretan pareko dabiltzala azaldu zuten nazio mailan eta herri mailan, “%60 inguru lortu da , gure herrian datu horretara heltzeko pixka bat falta bazaigu ere”.
Ekainaren 30 arte, ia bi hilabete dituzte aurretik erronka osatzeko falta den %40 hori lortzeko. Hala, herritar guztiak animatu dituzte bat egitera, harpidetza egin, eta antolatu diren bestelako elkartasun ekintzetan ere parte hartzera. Bi mugarri aipatu dituzte:”Hilaren 12an, datorren igandean, Gara erosita artista ezagunek egindako lamina hartzea izango da; bestea, musikari ezagunek ekainaren 9an Ilunben egingo duten kontzertua”. Bide horretan, Errenteria-Oreretak ere bere ekarpena egin nahi izan duela zehaztu zuten. Juan Manuel Cabada Errenteriako artistak eskultura bat eman dio babes batzordeari: “Badira gastu batzuk ordaintzeko, azpiegitura, lokala bera… 2.000 txartel aterako ditugu eta eskultura zozkatuko dugu”. Ekainaren 9an zozkatuko dute 12:00etan elkartasun batzordearen lokalean (Foru plaza) 12:00etan eta irabazleak eskulturarekin batera, bi lagunentzako afaria Oarso Sagardotegian, eta Versalles hotelean gaua eta gosaria irabaziko ditu. Zozketarako txartelak ere batzordearen lokalean salduko dituzte. Lokala egunero dago zabalik 18:30etik 19:30era.
Cabadaren eskulturak Errenteria-Orereta Mantxester Txikia bezala ezaguna izan zen garaira egin du jauzi. Pago egurrarekin, industrien hiru zati irudikatu ditu artistak, eta kea darien tximiniak. Forma geometrikoak erabili ditu bere artelana egiteko, eta guztia bi esku langilek, emakumearenak eta gizonarenak eusten dute.
Eskultura elkartasun batzordearen lokaleko erakusleihoan jarrita izango da zozketa egunera arte.
