76 proposamen bildu ditu Pasaiako PSE-EEk hauteskunde programan
Herritarren ekarpenak jaso, kontuan hartu eta eskertu dituzte
Miguel Angel Crespo, Izaskun Gomez eta Lore Suarez programaren aurkezpenean PSE-EEk gaur goizean aurkeztu du hauteskunde programa, Antxoko kultur etxean egin duen agerraldian. Hiru hautagai agertu dira prentsa aurrera: Izaskun Gomez alkategaia, Miguel Angel Crespo eta Lore Suarez. Programaren berri Izaskun Gomezek eman du eta 76 proposamen bildu dituztela nabarmendu du.
Programa osatzeko orduan herritarren ekarpenak izan dituzte kontuan, Gomezek jakinarazi duenez, eta 100 ekarpen inguru bildu dituztela jakinarazi du horretarako propio zabaldu duten parte hartze prozesuaren bitartez. Guztiak eskertu ditu.
Horiez gain, barrutien arteko oreka zaintzen eta arazo konpartituak lehenesten saiatu direla zehaztu du eta anbizio handiko proiektuak aipatu ditu baita ere, “sozialistek proiektuak” dituztela goraipatuz. “Asko egin da azken lau urtetan. Agintaldi oso produktiboa izan da, are gehiago kontuan hartuta aurreko paralisi egoera”, baietsi du Gomezek, jarraian “egiteko moduan” fokua jartzeko. “Gure agintaldian, koordinazioa, elkarlana, eta erakundeen arteko leialtasuna izan dira nagusi, eta iraganean, aldiz, paralisia, enfrentamendua, eta proiektu zein ideien falta”.
Proposamenak
Arloka aurkeztu ditu alkategaia sozialisten proposamenak, eta luzeegi joko luke hemen denak zerrendatzea, baina batzuk nabarmentze arren, ondokoak: Mugikortasun Plana; Antxoko Renfeko geltoki berria eta trenbidearen lurperatzea; Donibaneko saneamendua; tokiko merkataritza sustatzeko PERCO berria; ostalaritza eta udalaren arteko harremanetarako mahaia sortzea; turismo iraunkorra sustatu eta Itsas Festibala bultzatzea; Zirizan kulturgune berri bat sortzea; Euskara arloan Plan Estrategiko Berria martxan jartzea (indarrean dagoena datorren urtean bukatzen da); eta HAZ bulegoen ordutegia arratsaldeetara zabaltzea.
Portuari ere egin dio erreferentzia alkategaiak, eta portua eta hiriaren arteko harremana zaintzeko batzorde iraunkorra sortzea proposatuko dutela agin du, gai gatazkatsu guztiak aztertu eta bideratzeko.
Ekonomiaren atalean, itsasoa ardatz izango duen “ekonomia urdina” deritzan lan lerroa bultzatuko dutela jakinarazi du, berrikuntzan oinarrituta. Horrez gain, eta klima aldaketari erreparatuta, Pasaia gaiaren ikerketan erreferente bat izatea bultzatuko dutela gaineratu du.
Adinberri, Eskubidean, Etxean bizi… martxan diren eta egitasmotan jada jasota dauden beste egitasmo askori eusteko konpromisoa PSE-EEren aldetik.
“Gureak ez dira burutazioak. Ideiak ditugu, eta guztiak bideragarriak. Badakigu nola egin eta zein ate jo. Horregatik hauteskunde programa honek herritarren babesa jasotzea espero dugu” bukatu du Izakun Gomezek.
