Imanol Artola Oroitaldia, ekainaren 1 eta 2an
Imanol Artola Futbito Oroitaldian izena emateko aukera zabalik dago. Gehienez 32 taldek parte har dezakete. Zozketa maiatzaren 31n egingo dute Tiñelun.
Oroitaldiko beste edizio bateko artxiboko irudia. Imanol Artola Futbito Oroitaldiaren 29. ekitaldia ekainaren 1ean hasi, eta 2an bukatuko da. Hau da, 24 orduko formatu jarraia izango du aurten ere. Jada erreferentzia den kirol lehian parte hartzeko izen emate epea zabalik dago, maiatzaren 31ra arte. Ekainaren 1ean 10:00etan hasiko partidak Bekoerrota kiroldegian. Hurrengo eguneko goizean izango dira finalak.
Maiatzaren 31n, behin talde guztiek izena emana dutenean, egingo da partiden zozketa Tiñelu elkartean. Ordurako, esan bezala, talde guztiek izena emana izan behar dute. Hori egiteko aukera: arratsaldez Tiñelu elkartean dagoen zerrendan izena eman, eta talde bakoitzaren izen emate kuota ordaindu, 50 eurokoa (unean ordaindu behar da). Informazioa edo xehetasunak behar dituenak Tiñelura dei dezake: 943 57 43 65.
Taldeen kopuruak muga du, 32koa. Izena ematen duten lehen 32 taldeak onartuko ditu antolakuntzak. Talde bakoitzak, gehienez, 10 kide izan ditzake.
Lehen lau sailkatuei emango diete saria. Antolatzaileek iragarri dutenez, beste zenbait sari ere egongo dira.
