Indonesian ere gorena izango da Landarbaso
Errenteriako abesbatza Baliko nazioarteko abesbatzen jaialdian hartuko du parte Landarbaso abesbatzak uztailaren 26an. Asiako lehiaketa nagusietako bat da Singapur eta Taiwangoaren ostean, eta aukera paregabea izango du abesbatzak Errenteria-Oreretaren izena baita Gipuzkoarena munduan barrena zabaltzeko.
Ion Collar, Amaia Tolaretxipi eta Iñaki Tolaretxipi. Landarbaso abesbatza goren-gorenean dabil, eta horren erakusle datorren uztailean Bali uhartean (Indonesia) bandung Choral Societyk antolatzen duen Baliko Naizoarteko Abesbatzen Jaialdian parte hartuko duela. Horren berri emateko agerraldia egin dute gaur Iñaki Tolaretxipi abesbatzaren zuzendariak, Amaia Tolaretxipik abesbatzako partaideak eta Ion Collar Kultura zinegotziak.
Asian antolatutako lehiaketen artetik garrantzitsuenetako bat dela zehaztu du Landarbasoren zuzendariak, “Singapur eta Taiwango abesbatzen lehiaketen ondotik garrantzitsuena da eta sona handia du”. Lehiaketa bi zatitan banatuta dagoela zehaztu du, “final laurdenak eta final erdiak jokatuko dira uztailaren 24 eta 25ean eta horietan 80 puntutik gora lortzen dituzten abesbatza guztiak pasako dira finalera”. Lehen mailako lehiaketetan 80 puntutik gora dituzten abesbatzek aukera dute zuzenean finalera igarotzeko, eta hori da Landrabaso abesbatzaren kasua, eta 26ko finalera sartuko da zuzenean, beraz.
Landarbaso Abesbatzaren 38 abeslari izango dira lehiaketan eta bi modalitatetan arituko dira erlijio musikan eta abesbatza mistoetan, “bertako folklorea eraman nahi genuen eta modalitate horretan parte hartu ere, baina bitan baino ezin gara lehiatu, nahiz eta hamar diren aukeran”. Hori konpondu dute hala ere, abesbatza mistoen modalitatean euskal folklorea txertatuko dutelako.
Lehiaketaz gain formaziorako aukera dute bertaratzen diren abesbatzek beti ere, ez badute final laurden eta erdietan parte hartzen eta egun horietan beraz, formaziorako baliatuko dute denbora: “Jaso eta eman egingo dugu, eta hori ere luxua izango da, nazioarteko lehiaketa horretan parte hartzea bezalaxe”. Irabaztera doazela esan du zuzendariak, “dena hori ez bada ere, izan ere, lehiaketetan asko ikasten da, presioa sumatzen duzu positiboan, eta esperientzia polita izango da. Abesbatzaren arrakasta handiena zein den ere kontatu du Tolaretxipik, “Landarbaso osatzeko beharrezkoa denean, harrobitik tira ahal izatea. Indonesiako lehiaketan Dizdizka gazteen abesbatzako hiru gazteek hartuko dute parte, Landarbaso abesbatzako hainbat lagunek ezingo dutelako lan kontuengatik. Erronka handia da 18 urteko hiru gazterentzat halako exijentzia duen lehiaketan parte hartzea eta satisfazioa guretzako, gure harrobitik tiratzea dugulako”.
Collarrek goraipatu egin du Landarbaso abesbatzak egiten duen lana, “Gure herriaren izena munduan barrena zabaltzen ari zarete. Eman eta zabalzazu leloa etorri zait burura, oso ondo egiten duzuelako egiten duzuena, jakituria zabaldu eta herriaren izena ere zabaltzen duzue”. Saria etxera ekarriko duten ez dakite, baina euskal kulturaren zati bat Indonesiara eramatea, eta esperientzia bera dagoeneko saria izango duten zalantzarik ez dute.
