Ateak zabalduz iniziatiba, erretiratuen eskutik
Helburua, astebetez egitarau oparoa eskaintzea herritar orori, eta urtean zehar elkarteetan ehunka jubilatuk egin dituzten lanak ikusgai jartzea.
Ateak zabalduz iniziatiba aurkeztu dute gaur erretiratuen elkarteek. Ateak Zabalduz! astea antolatu dute zazpigarrenez Errenteria-Oreretako jubilatuen zortzi elkarteek, Lagunkide taldeak eta Errenteriako Udaleko Gizarte Zerbitzuen azpisailak. Helburua, astebetez egitarau oparoa eskaintzea herritar orori, eta urtean zehar elkarteetan ehunka jubilatuk egin dituzten lanak ikusgai jartzea. Gaur aurkeztu dute datorren astelehenetik, (hilaren 13tik), ostiralera (hilaren 18ra) egingo duten astea Merkatuzarren Nagore Basurto Ongizate zinegotziak eta jubilatu elkarte guztietako ordezkariek.
Ekintza gehienak Merkatuzarren izango dira, tailerrak irekiak izango dira eta erakusketa, berriz, doakoa. Astearen barruan, ikasturte osoan zehar izandako jardueren argazkiak ikusteko aukera izango da, horretarako prestatuko duten txokoan. Astelehenean jubilatuek herriko elkarteetan egindako lanen erakusketa zabalduko dute Merkatuzarren. Denetarik ikusteko aukera izango da 10:30etik 13:00ak arte eta 17:00etatik 20:00ak arte. Jarduera fisikoa sustatzeko programa, bisita gidatuak, zumba silver saioa, dantza tailerra, gozogintza osasungarria tailerra, eta loregintza tailerra antolatu dituzte, besteak beste, astearen barruan. Ekintzarik ikusgarriena berriz, Euskal Jaia izango da aurten ere. Asteazkenean (hilak 15) 17:00etan irtengo da Merkatuzarretik, eta hamarnaka eta hamarnaka erretiratuk girotuko dute herria musika eskolako ikasleek lagunduta. Ostiralean, berriz, omenaldien txanda eta bazkaria helduko dira. 30 urtetik gora bete dituzten jubilatuen elkarteak omenduko dituzte: Beraun, Kaputxinoetako San Jose, Alabergako La Madalena, Gabierrotako Laguntasuna eta Galtzarabordako El parque. Beraungoa da aitzindaria, izan ere, 50 urte bete ditu aurten, eta lehenengoa izan zen Errenteria-Oreretan; gainontzekoak 30 urtetik gora dituzte.
Zortzi erretiratu elkarte daude Errenteria-Oreretan eta horietan 3.100 lagun biltzen dira.
Egitaraua
Hilak 13, astelehena
- 10:30-13:00 eta 17:00-20:00: Erakusketa Merkatuzarren astelehenetik ostegunera.
- 10:30-13:00: Bisita gidatua Urnietako ontzien sailkapen plantara.
- 17:30-19:30: Gozogintza osasungarria tailerra, Merkatuzarren.
Hilak 14, asteartea
- 10:30-13:00: Lagunkide-Acogeren topaketa.
- 17:30-19:30: Birziklapenaren gaineko hitzaldia, Jose Luis Gallegoren eskutik.
Hilak 15, asteazkena
- 09:30-13:00: Ibilbide osasungarriak kiroldegiko begiraleekin 3kmkoa eta 13 kilometrokoa. Izena eman behar da aurretik erretiratuen elkarteetan.
- 10:30-12:00: Zumba silver. Adinekoentzat soinketa.
- 17:30-19:30: Euskal Jaia Merkatuzarretik abiatuta.
Hilak 16, osteguna
- 10:30-12:00: Dantza tailerra Merkatuzarren.
- 17:00-20:00: Loregintza tailerra Merkatuzarren.
Hilak 17, ostirala
- 13:45: Bazkaria Merkatuzarren. Aurrez izena eman behar da.
- 16:00-16:30: Omenaldia Merkatuzarren.
- 16:30-19:00: Dantzaldia Merkatuzarren Djarekin.
