Euskadiko Kopako lehen proban Pasaia Kayak jaun eta jabe
Ion Carballok irabazi zuen Seniorren Proba
Carballo, Rodriguez eta Araneta, Pasaia Kayak taldeko palista lehiakorrenak Uribarri Ganboan. Ulibarri Ganboako urtegian hasi zen lehengo asteburuan itsas kayakeko Euskadiko XV. Kopa, eta Pasaia Kayak-ek irabazi zuen proba bere palistek kategoria guztietan egindako lan txukunari esker.
Senior Mailan, K-1ean, podiumera igo ziren denak, Pasaia Kayak taldekoak. Ion Carballok irabazi zuen proba eta haren atzetik eta hurrenez hurren Lander Rodriguezek eta Aritz Aranetak, Pasaia Kayak taldeko hiru palista onenak.
K-2an Iñigo Lois eta Gorka Colomo lehiatu ziren, elkarrekin lehen aldiz eta emaitza ezin hobearekin, K-2 zumaiarra gainditu eta proba irabaztea lortu zutelako.
Eta jardunaldia biribiltzeko, +50 Beteranoetan Pasaia Kayak-eko Txema Yarzaren garaipena. CN Aldayeta taldeko piraguistarekin azkeneraino lehia estuan ibili zen, baina kontrarioa irauli zen eta pasaitarrak garaipena poltsikoratu.
Garaipenak pilatuta, taldekako sailkapenaren buru jarri da Pasaia Kayak, 182 punturekin.
Bigarren proba etxean jokatuko da, Pasaian, hilaren 19an.
Coloma eta Lois, K-2an elkarrekin lehen aldiz, Ulibarri Ganboan.
