Hiru ibilbide berri auzoetan barrena
Hainbat auzo zeharkatzen dituzten hiru orientazio mapa berri sortu ditu udalak. Fanderian kokatuta dago lehena; Alaberga, Galtzaraborda eta Beraunen barrena doa bigarrena; eta hirugarrenak, berriz, Agustinak eta Gaztaño zeharkatzen ditu.
Orientazio mapetako bat. Argazkia: Herri Bizia Orientazio mapa tresnatik abiatuta lau ibilbide sortu zituen iazko azaroan Errenteriako Udalak Listorretako parkean. Lau horiei beste hiru gehitu dizkio orain, izan ere, hainbat auzo zeharkatzen dituzten hiru orientazio mapa berri sortu ditu. Fanderian kokatuta dago lehena; Alaberga, Galtzaraborda eta Beraunen barrena doa bigarrena; eta hirugarrenak, berriz, Agustinak eta Gaztaño zeharkatzen ditu.
Orientazio mapa berriak Turismo Bulegoa eskura daitezke (943 494 521) edota Herri Biziaren web orrian. Orientazio mapen bidez, seinalizatutako ibilbide bat egitea da helburua, pistak bilatuta eta maparen zenbakiei jarraituz. Ibilbidearen puntu bakoitzean dagoen plaka aurkitu behar da, ibilbidearen amaieraraino iritsi arte.
Orientazio kirolak jarduera fisikoa eta mentala uztartzen ditu, parte hartzailearen autonomia jorratzen du, eta toki eta ingurune berriak ezagutzea ahalbidetzen du. Bakarka, taldeka, familian, lehia edo aisialdi jarduera moduan egin daiteke.
Aisialdi eta turismo jarduera ere bada, gainera, joko edo kirol moduan ingurua ezagutzeko aukera dibertigarri bilaka daiteke. Distantzia ezberdinetako ibilbideak egitea da helburua, horretarako, mapa batean ageri diren orientazio jarraibideak aintzat hartuta soilik. Orientazio mapen iniziatiba 2017ko ekainean Errenteriako Udalak onartutako Jarduera Fisikoaren eta Kirolaren Plan Integralaren barruan kokatu dute, “bertan jaso zen hainbat tresna eduki behar ditugula, esku hartzeak barne hartzen dituzten irizpide batzuk hiri osasungarri bat egiteko eta hirigintzaren eremuan bizitza aktiboa sustatzeko”.
