Euriteen eraginez luizia izan da Lezo eta Donibane artean eta errepidea moztuta dago
Portu barrutik desbideratuko dute trafikoa. Oarsoaldeko beste hainbat puntutan arazoak sortu dituzte euriteek, baina ez da ezer larririk gertatu, zorionez.
Luizi handi bat izan da gaur goizean Lezo eta Donibane arteko errepidean, azken orduetako eurite etengabeen eraginez. Udaltzain eta suhiltzaileak bertaratu dira ingurura, eta errpidea moztu behar izan dutenez, trafikoa portutik desbideratuko dutela iragarri dute, autoentzako sarrera eta irteera, Donibanen garai bateko zentral termikoaren gunetik atonduta. Jaizkibelgo errepidea ere moztu behar izan dute.
Ohikoak dira luiziak inguruan, eta azkenego honek irudi ikusgarriak utzi ditu. Zorionez, kalte pertsonalik ez da gertatu.
Uholde arriskua handia da Bidasoa eta Urumea ibaien inguruan.
Errenteria-Orertan ere urak hartuta dauden hainbat gune.
Oiartzunen ere, arazoak
Oiartzunen, berriz, Intzensoroko hormigoizko bidea txikitu du euriak, eta Oialekura bidean luizi bat egon da, zauriturik utzi gabe. Egon da bestelako interbentziorik; ezer larririk ez. Euskalmetek 10:00etan eman du 24 ordutan pilatutako euri kopuruaren berri, eta Oiartzunen 116 litro izan dira. Datozen orduetan, kopuruak gora egingo duela dirudi, baina Oiartzun ibaiaren arroa jaisten ari da. Garraio publikoari dagokionez, Lanbarren eta Lintziringo geltokietan ez da autobusik geldituko.
Arretaz gidatzeko eskatu dute.
