Jaixki Euskal Ligara igo da
Oritxe Tolosaldearen kantxan partida bakarreko kanporaketa irabazita eskuratu dute igoera lezoarrek. Larunbatean finala jokatuko dute.
Jaixkiko jokalariak, Tolosan. Sasoi handia egin eta gero, Gipuzkoako Lehen Maila utzi, eta Euskal Ligara igo da Jaixki Areto Futbol Taldea. Ligan laugarren izan ondoren, Orixe Tolosaldea lehenaren kontrako kanporaketa zuzena (partida bakarrekoa, Tolosan) jokatu zuten asteburuan lezoarrek, eta arauzko denbora 3-3 emaitzarekin bukatu ondoren, penaltietan irabazi eta Euskal Ligarako txartela lortu zuten.
Partida latza izan zen, atsedenaldian 2-0 emaitzarekin atzetik zeudelako lezoarrak; bigarren zatian kasta atera, eta berdinketarekin bukatu ziren partidaren 40 minutuak.
Orain, Gipuzkoako Lehen Mailako finala jokatu behar dute lezoarrek, maila horretako txapeldun nor izango den erabakitzeko. Oiartzunen kontra du finala Jaixkik, larunbatean, 19:15ean Zarauzko Aritzbatalde kiroldegian. Oiartzunek beste kanporaketan Euskalduna gainditu zuen (6-2).
Hara joateko autobusak antolatu ditu Jaixkik, Kopa altxatzean (irabazten badute), zaleak nahi dituztelako ondoan. Hala, bost euroren truke, une hunkigarri horretaz gozatzeko, eta partidan zehar animatzeko aukera dute zaleek. Autobusa larunbateko 17:00etan aterako da Sotxotik; Zarauztik buelta 21:00etan egingo dute, Lezora iritsitakoan Jaizkibel tabernan luntxaz gozatzeko.
