Klima aldaketari galga jarri nahi diote
Energia arduraz kontsumitu eta klima aldaketari galga jarri nahi diote Errenteria-Oreretako ikasleek. Horretan aritu dira ikasturte honetan Agenda 21 programaren barruan. Gaur foroa izan dute LH, DBH eta Lanbide Heziketako zazpi ikastetxeetako ikasleen ordezkariak.
Eskola Agenda 21n parte hartzen ari diren ikasleen ordezkariaek foroa egin dute gaur udaletxeko plano aretoan. Energia arduraz kontsumitu eta klima aldaketari galga jarri nahi diote Errenteria-Oreretako ikasleek. Horretan aritu dira ikasturte honetan Agenda 21 programaren barruan. Gaur foroa izan dute LH, DBH eta Lanbide Heziketako zazpi ikastetxeetako ikasleen ordezkariak.
Bizarain LH Ikastola, Bizarain DBH Ikastola, Cristobal Gamon LHI, Don Bosco, Egiluze Gurutzearen Alabak, Koldo Mitxelena Institutua, Koldo Mitxelena Herri Ikastetxea, eta Telleri Alde ikastetxeak hartu dute parte , 3.300 ikaslek baino gehiagok.
Ikasturtearen lehenengo hiruhilekoan ikasleek gaia ezagutu eta sentsibilizazio jarduerak egin dituzte. Ikastetxe bakoitzeko diagnostikoa egin dute ondoren, gaia nola jorratzen den ikastetxe bakoitzean aztertu, ikastetxe bakoitzak duen energia kontsumoa aztertu eta hura nola hobetu erabakitzeko. Bigarren hiruhilekoan berriz, herria aztertu dute. Lanketa zikloka banatuta, dauden ohiturak eta energia kontsumoek ingurumenean duten eragina ezagutu dituzte: argiztapen sistemak, berokuntza, elektrizitate tresnak, berotegi efektuko gasak, klima aldaketarekin duen harremana…
Azken hori 5 eta 6. mailako ikasleek aztertu dute kalera irtenda. Helduenen iritziak jaso dituzte inkesta baten bidez. Galdera zehatza egin diete: Eguraldia benetan erotzen ari al da? Askotan egiten diren baieztapenak frogatzeko aukera izan dute horrela, lehen elur gehiago egiten zuela, zirimiria desagertu dela, oraingo tenperatura aldaketa bortitzak ez zirela gertatzen…
Bigarren hezkuntzakoak berriz, herritarrek energiaren kontsumoarekin lotuta dituzten ohiturak eta jokabideak jaso dituzte. Lanbide Heziketan, berriz, energia kontsumoa aurrezteko moduak landu dituzte.
Azken hiruhilekoan ikasmaila ezberdinetan egindako lana bateratu dute eta ikastetxe ezberdinetako ikasleak foro bakarrean elkartu dira gaur udaletxeko pleno aretoan, gaia hobetzeko hartutako konpromisoak eta udalari eginbeharreko proposamenak adosteko.
