Izaskun Gomez (Pasaiako PSE-EE): "Pasaiarako aurrerabidea dakarren proiektua aurkezten dudala uste dut"
Izaskun Gomez, PSE-EEren hautagaiari HITZAk egin dion elkarrizketa, Pasaiako hautagaiei egindako elkarrizketa errondaren barrukoa.
Zergatik eman behar dizute herritarrek botoa zuri?
Nire hautagaitzak eta nik aurkeztu dudan proiektuak, kudeaketaren eta erakunde arteko elkarrizketaren bermea dute, Pasaiari sekula galdu behar izan ez zuen duintasuna eta bizi kalitatea itzultzeko. Gure aurretik egon zen Bilduren gobernuak ekarri zuen paralisia eta iniziatiba faltaren aurrean, Pasaiarako aurrerabidea dakarren proiektua aurkezten dudala uste dut, proposamen zehatz eta bideragarriekin,
Zure ustez, zeintzuk beharko lukete Pasaian lehentasunak?
Enpleguaren lehentasunari heldu behar diogu, eta hainbat esparruetatik landuko dugu, Adinberri bezalako proiektu berriak erakarriz, eta “Ekonomia Urdina’ deitutako zerbitzu sektore berria garatuz, itsasoarekin eta turismoarekin iraunkorrarekin lotuta eta Itsas Festibala bezalako proiektuekin.
Pasaitarrak beren burua seguru sentitu dezaten beste lehentasunetako bat izan behar du eta horretarako neurri zorrotzak eta berehalakoak proposatzen ditut nire programan: Ertzaintzarekin elkarlan handiagoa, eta izaera prebentiboarekin bideozaintza eta oinezko patruilak indartu zonalde sentikorrenetan.
Babestutako etxebizitzak, bereziki gazteenentzat, Luzuriagako bigarren fasean, eta irisgarritasunaren hobetzeko igogailu berriak jartzea Donibanen eta Trintxerpen, goiko zonaldeetako mugikortasuna errazteko.
Zirizan Sormen industrien eta Arterako zentroa sortuko dugu. Horrez gain, iraunkortasunaren aldeko apustu bat egingo dugu tokikotik, birziklatze boluntarioa sustatuz, eta aldaketa klimatikoak itsasoaren mailan izango duen eraginaren ikerketan Pasaia erreferentzia izan dadin bultzatuz.
Pasaian asko hitz egiten da biziberritzeaz. Zuk nola, zer ulertzen duzu biziberritzeaz? Zer esan nahi du zuretzat Pasaia biziberritzea?
Bide orria gainontzeko erakundeekin elkarlanean aritzea da, Diputazioarekin, Eusko Jaurlaritzarekin, eta Gobernu Zentralarekin batera hiri biziberritzea ez ezik, biziberritze soziala eta ekonomikoa bultzatzeko, eta modu horretan pasaitarrentzako aukera berriak sustatu.
Gakoa da Adinberri zentroaren martxan jartzea, Luzuriagako babes ofizialeko etxebizitzen garapena, eta Hospitalilloko 440 aparkaleku plazen eskaintza. Luzuriagako operazioa berriz martxan jartzeko aukera eskura dugu, gertu, eta horrek 900 aparkaleku plaza sortzea ekarriko luke; Renfeko geltoki berria ere hor dago. Bestalde, Eskubidean eta Etxean Bizi bezalako gizarte programak. Guztiak dira proiektu gakoak Pasaiaren biziberritzerako.
Azken hauteskundeetako emaitzak ikusita Pasaian gauzak estu egon daitezkeela dirudi. Gobernatzeko aukera izango bazenu paktuetara zabalik izango zinateke?
Honi dagokionez, begirunez jokatzea gustatzen zait: utz diezaiegun pasaitarrei botoa ematen igandean, maiatzaren 26an. Ziur naiz gure gobernua nola osatzea nahi duten interpretatzeko “argazki” erraz bat emango digutela, beti gertatzen da. Hortik aurrera, ikusiko dugu.
Alkatetzatik Pasaiako barruti bakoitzean egingo zenukeen lehen gauza edo gauzatuko zenukeen lehen proiektua.
Elkarrizketa bitartean hainbat egitasmo aipatzen joan naiz, eta egia esateko ez da erraza erantzuten zein izango del lehena, exekuziorako behar dituzten epeak, eta proiektuen konplexutasuna ez delako kasu guztietan berdina, eta askotan ezta antzekoa ere.
Nire konpromisoa da beharrezko finantzazioa lortu ahala gauzatzen joatea, agintaldi honetan egin dudan antzera.
