Portuak esleitu ditu Kaiko Herreran pabiloiak eraikitzeko lanak
Biltegien estalkian, kirol eta aisialdi instalazioak eraikiko dituzte, lurrak desjabetu ondoren.
Kaiko Herrerako pabiloi berrien inforgrafia Lanek ia 5 milioi euroko (4,7) aurrekontua dute, eta Iza Obras y Promociones, S.A. enpresari esleitu dizkiote. Helburua, Kaiko Herreran pabiloi berriak eraikitzea.
Herrerako Topo geltokia eta Trintxerperen artean altxako dituzte pabiloiak, igarobide berriaren azpialdean. Portuak zehaztu duenez, obraren exekuzioa 14 hilabetekoa da, beraz, datorren urteko udarako bukatuta egotea aurreikusi dute. “Hurrengo urteko abuztuan, portuko jarduera sendotzeko ezinbestekoak diren biltegiak edukiko ditugu, baita hiri-birsorkuntzaren eta herritarren bizi-kalitatearen aldeko leku paregabea ere”, adierazi du portuko lehendakari Felix Gartziandiak.
Izan ere, Portuak ohartarazi duenez, “oinezkoen pasarelatik gaur egun ikusten den zulo handian” eraikiko dituzte pabiloiak, eta “irabazitako lurrazalean, kirol eta aisialdi instalazioak” eraikiko dituztela esan dute, “Pasaiako eta Donostiako herritarren ongizatea erraztu asmoz”.
Horretarako, baina, estalkiaren lurrazala Portu Agintaritzaren jabetza izateari utzi eta jabego publikokoa izatera pasatuko da, orain gutxi Hospitalilloarekin egin antzera.
