Urteko uzta erakusteko garaia
Auzoetako emakume elkarteetan ikasturtean zehar egin dituzten lanak bildu dituzte 'Emakumeak martxan ahalduntzerako bidean' erakusketaren bidez.
Astelehenean eho-ziri lanak izango dira Merkatuzarren. Errenteriako auzoetako emakumeen elkarteek udalarekin batera ikasturtean egin dituzten lanak erakutsiko dituzte. Merkatuzarrek hartuko du erakusketa hori Emakumeok martxan, ahalduntzerako bidean lelopean hilaren 27tik 31ra bitartean 17:00etatik 20:00etara. Ikasturtean zehar egin dutena ezagutzera emateko egunak izango dira beraz, jendarteratzeko aukera.
Halaber, Eraldaketa Feministarako Eskolan landutakoak ere bere lekua izango du egun horietan panelen bidez. Herritar guztiei eta bereziki emakumeei zabalik dagoen programa dela gogorarazi dute udaletik eta parte hartzera deitu, ekintza guztiak Merkatuzarren egingo dituzte.
Egitaraua
- Astelehena, 27: Ehoziri lanak 17:00etan.
- Asteartea, 28: Mahai jokoan 17:00etan; Olio pintura, 18:30ean.
- Asteazkena, 29: Euskal dantzak 18:30ean.
- Ostirala, 31: Areto dantzak, 17:00etan.
