Elkarrekin Podemos: "Aurreikusi duguna ez dute bete emaitzek"
Hauteskundeen biharamunean bertan, emaitzak bero-bero direla egin du balorazioa Elkarrekin Podemos koalizioak. Gazi gozoa.
Errenteria Elkarrekin Podemos koalizioak programa aurkeztu zueneko argazkia., iazko maiatzean. Hauteskundeen biharamunean bertan, emaitzak bero-bero direla egin du balorazioa Elkarrekin Podemos koalizioak. Gazi gozoa. Gazia, Errenteria Irabaziz izenarekin zituen lau zinegotzietako bat galdu duelako atzoko hauteskundeetan orain Elkarrekin Podemos den koalizioak, eta horrenbestez, laugarren indar politikoa izango delako hurrengo agintaldian. Gozoa, emaitzek erakutsi dutelako beraiek kide izan diren Errenteriako Udaleko Gobernu taldearen lana babestu dutela herritarrek: ” Kudeaketa horretan, gure zinegotziek lan handia egin dute kultura, ingurumena edota gizarte zerbitzuen arloan. Egiaztatu dugu hala ere, koalizio gobernu batean indar handiagoa duen alderdiaren lana kapitalizatzea ohikoa dela, EH Bildurena kasu honetan, eta gobernuan lagun duen alderdiak ez duela izaten hainbesteko isla sozialki”.
2.656 bozka lortu zituen atzo udal hauteskundeetan Elkarrekin Podemos koalizioak, eta beren boto txartela aukeratu duten herritar horietako bakoitzari esker ona azaldu dio, argi esanda, emaitzek ez dituztela bete Elkarrekin Podemosek kanpainan aurreikusia zuena.
Aurreko hauteskundeetan beraiengan konfiantza izan duten eta atzokoan bozka eman ez zieten pertsonen “ilusioa” eta “konfiantza” berreskuratzeko gaur bertan hasiko direla lanean erantsi du Elkarrekin Podemosek, “baita Elkarrekin Podemos indartzeko eta gure herrian hazten jarraitzeko elementuak aintzat hartu eta bideratzeko. Gaurtik lanean hasi garela ziurtatu dezakegu Errenteriak aurrera egiten jarrai dezan, azken zortzi urteetan bezala”.
Lan horrek gainera helburu argi eta zehatza izango duela gaineratu du, “udal politiken erdigunean pertsonak jartzea, lan egin jendearekin eta jendearentzat izango den Errenteria bat eraikitzeko”.
