Komunikazioa feminismotik eraldatuko dute
Solasaldia gidatzen hiru emakume feminista, bakoitza komunikazioaren esparru ezberdinean aritua: Bea Egizabal, Danele Sarriugarte, eta Laura Contreras.
Radio Calles y Cuerpos Costa Ricako irrati feminista iniziatibaren irudi bat. Komunikazioa feminismotik nola eraldatu aztertuko dute Emakumeen Etxean ostegunean. Orokortzat eta normaltzat ematen den umorea, iruditegia eta harremantzeko erak, emakumeak ama, bikote edo alaba baino gehiago direla, irudi eta hitzek duten garrantzia, indarkeri sinbolikoa izan daitezkeela mahai gainean jarri eta hausnarketa egingo dute 18:30ean hasiko den mahai inguruan.
Solasaldia gidatzen hiru emakume feminista, bakoitza komunikazioaren esparru ezberdinean aritua: Bea Egizabal ipuin kontalari eta clowna, Danele Sarriugarte testugintzan aritua, eta Laura Contreras Colectiva Caminando eta Radio Calles y Cuerpos kolektiboko kidea, aktibismoan, irrati komunitarioan eta kale ekintza poetikoan aritua.
Bestalde, Emakumeen Etxeak ateak zabalik dituela astelehen eta ostiraletan 09:00etatik 13:00etara eta asteartetik ostegunera 16:00etatik 20:00etara ekarri dute gogora, baita telefonoz 943 449 630 zenbakira deitu, edota posta elektronikoa erabili daitezkeela ere harremanetan jartzeko.
