Munttarperen ordua iritsi da
Igoerako ligaxkan bigarren gelditu ondoren, Euskal Ligara igotzeko bigarren aukera du Munttarpek, Donibane eta Lezo artean jokatuko den play-offean.
Munttarperen gizonen taldea. Euskal Ligara igotzeko ligaxka fasean bigarren gelditu zen Munttarperen gizonen taldea, mailaz igo zen Urnieta lehenaren atzetik. Ez zen zuzenean igo, beraz. Baina taldeak badu bigarren aukera bat koska bat gora egiteko: ligaxka horretan izan ziren beste lau taldeen arteko play-offa jokatuko da asteburuan, ‘final four’ formatuan.
Lauko final horretan lehenik eta behin finalerdiak jokatuko dituzte. Larunbatean dira, Donibaneko kiroldegian (Imanol Artola 24 orduko futbito oroitaldiarekin okupatuta dago larunbatean Bekoerrota kiroldegia). 16:00etan da lehena, Escolapios (Bilbo) eta Legazpi taldeen artekoa. Bigarrenean, etxekoak: Munttarpek Leioako (Bizkaia) Askartzaren kontra jokatuko du, 18:00etan hasita.
Bi finalerdi horietatik garaile direnek finala jokatuko dute igandean, 11:30ean, kasu honetan bai Bekoerrotan —ondoren Imanol Artolaren finala jokatuko da—. Eta azken partida hori irabazten duena, Euskal Ligara igoko da.
Finalerdirako analisia egiterakoan, aurrekari bakarra, eta baikorra. Munttarpe behin bakarrik neurtu da Askartzarekin, hain zuzen joan den asteburura arte indarrean izan den igoera ligaxkan. Hala, fase horretako partidan, maiatzaren 11n 20-27 irabazi zuten lezoarrek Leioan. Erraz. Hortaz, esan daiteke finalerdietako neurketa horretan Munttarpe dela faborito.
Munttarpeko kideek zaleen laguntza eskatu dute, lehenik, larunbatean 18:00etan Donibaneko kiroldegian jokatuko duten finalerdirako. Lezoarrak finalera iristen badira, presio lapikoa izan behar du igande goizean Bekoerrotak.
