Batelerek ez dute hutsik egin
Guruzne Azpirozen neskek etengabeko hobekuntzari eutsi eta aurten ere Kontxan izango dira. San Pedrok presiorik arraun egin du.
Betiko legez, Sanpedro eta San Juango zaleek arraulariei babesa eman diete Donostiako portuan San Juan-Koxtapeko neskek Kontxako banderan parte hartuko dute. 12 minutu eta 43 segundoko denborarekin, 6. postuan bukatu dute arrosek eta bigarren txandan lehiatuko dira datozen bi igandeetan.
Ez da estropada erosoa izan, marea jaisten ari zen, itsaso zatarra topatu dute tripulazioek eta traineruak alde batetik bestera mugitu dira. Ziabogara iritsi orduko, Donibanekoek nahiko ziaboga txarra egin dute eta bazirudien estropadari eragingo ziola. Sartzeko luzean ordea, egoera guztiz irauli eta nagusitasunez zeharkatu dute helmuga gazteek.
Aro berria abiatu dute Kontxan San Juan-Koxtapeko neskek. Itzelezko presioarekin abiatu zuten aurtengo sasoia, taldea hutsetik osatzeaz gain, Kontxan bost aldiz jarraian irabazle izandako batelerak ordezkatu behar zituzten eta. Lanaren bitartez ordea, presioari aurre egin eta etengabe egin dute gora. Gaurko sailkapenak, ongi irudikatu du tripulazioaren sasoia.
Gizonek ez dute halako zorterik izan. Jose Luis Korta iritsi denetik taldeak gora egin du eta geroz eta lehiakorragoa izan da, baina ez da nahikoa izan onenen artean egoteko. 21 minutu eta 41 segundorekin, 18. postua sailkapenean arrosentzat.
Playoffari begira
Aspaldian ez zuten San Pedroko arraunlariek halako estropadarik izan. Denboraldiko lehen estropadatik maila ez galtzeko borrokan egon dira, eta gaur, lehen aldiz muturreko presiorik gabe egin dute arraun, argi baitzuten sailkatzea ia ezinezkoa zela.
Dena dela, serio aritu da Libia. Itsasoak gogotik jotzen zuen arren, Ander Etxegoienek ziaboga paregabea egin du, ohiko legez. Guztira 21 minutu eta 6 segundoan burutu dute estropada.
Playoffari dagokionez, pozik bukatu dute sanpedrotarrek, arerioekin indarrak neurtu eta gehienen aurretik bukatu dutelako.
