Antxoko Tren Geltoki Berriaren Plataformak batzarra egingo du hilaren 14an
Herri batzar informatiboa izango da eta Antxoko Kultur Etxean egingo dute. Geltokiak libre utzi ditzakeen espazioen berri emango diote herritarrei.
Duela hilabete batzuk, Antxoko geltokia berrituko jakinarazi zuen ADIFek Antxoko Geltoki Berriaren Plataformak batzar informatiboa egingo du hilaren 14an (larunbata), Kultur Etxean, 11:30ean. Plataformak Antxoko trenbidearen eremua optimizatu nahi du, herriak espazioa irabaz dezan. Gaur egun Antxo azpiegitura eta eraikinez inguratuta dago, baina lurralde horiek eskuratzekotan Antxo iparralderantz zabaldu ahalko litzateke. Herriaren orografia konplexuaz jakitun izanda, geltokiari kendutako eremua, arnasgune garrantzitsua izango litzateke kideen arabera.
Iaz jakinarazi zuen Adifek, Antxoko tren geltokiaren kudeatzaile nagusiak, geltokia birmoldatuko zuela, egungo beharretara egokitzeko. Albistearen berri izan bezain laster, Antxoko zenbait herritarrek elkarte bat sortu zuten, herriari mesedea egingo dion konponbide bat eskatzeko. Eduardo Perez Cortes plataformako kideak, hasieratik esan zuen, geltokiarena Antxo biziberritzeko aukera paregabea zela. Ordutik haien proiektuaren nondik norakoak zabaltzen ibili dira eta inguruko erakundeei esku hartzeko eskatu diete.
Hilaren 14an egingo den herri batzarrean proiektuaren helburuak azalduko dituzte, baita Antxorengan izango dituen abantailak ere. Xede nagusia, barrutiak iparraldean espazioa bereganatzea da, izan ere, N1 errepideak eta bereziki portuko trenbideak, Antxo giltzapetu dute. Gainera, inguruko azpiegitura eta garraioak kaltegarriak dira biztanleen osasunerako.
Nafarroa etorbideko bizilagunak izango lirateke onuradun nagusiak. Kaleak 30 eta 16 metro bitarteko zabalkundea izango luke, errepidea etxeetatik urrunduz. Era berean, metro gutxi horietan, pasealeku bat eta zonalde berdeak eraiki ahalko lirateke besteak beste. Funtsean, ADIFek erabiltzen ez duen eremu txikia, Antxotarrentzat aukera handia izan daiteke.
