Jorge Oteizaren lana ezagutzeko bisita gidatuak asteartero
Victor Hugo Etxeko 'Jorge Oteiza Marrazkiak, Estanpak Hitzak (eta Eskulturak)' erakusketa hilaren 29an bukatuko da. Ordura arte bisita gidatuak egingo dituzte, asteartero.
Erakusketa Victor Hugo Etxean izango da ikusgai hilaren 29a arte. Uda osoa Victor Hugo Etxean eman ostean, Pasaiako Udaleko Kultura eta Hezkuntza sailak antolatutako ‘Jorge Oteiza Marrazkiak, Estanpak Hitzak (eta Eskulturak)’ erakusketa laster bukatuko da, hilaren 29an. Azken asteotan merezitako bultzada emateko asmoz, doako bisita gidatuak antolatuko dituzte asteartero, euskaraz zein gaztelaniaz.
Lehen bisitak gaur bertan izango dira; 19:00tan lehen txanda egingo dute, gaztelaniaz, Felix Marañaren gidaritzapean. Hurrengo txanda, 20:00tan izango da eta Aitor Azurkik gidatuko du, euskaraz. Datozen bisita gidatuak asteartero izango dira eta ordutegi berdinean.
Felix Maraña da erakusketaren sortzailea, eta Jorge Oteizak egindako lanaren oroigarria izatea du helburu nagusitzat. Eskultorearen 70 argazki eta grafiaz osatzen da erakusketa, baita formatu txikiko 12 eskulturez. Marañak zuzendutako erakusketa, poesiari egindako kantu irmotzat definitu dute, Oteizaren obra bere osotasunean biltzen duen hizkuntza.
