"Lan istripuak ez dira kasualitateak sortutakoak"
Langilea hil zen poligonoaren atarian egin dute elkarretaratzea. Gehiengo sindikalaren deialdiari jarraiki, elkarretaratzea egin dute goizean Lezoko Ipintza industrialdearen sarreran. Industrialde horretako Kuluxka enpresan hil egin zen joan den ostiralean 26 urteko gazte nafar bat, lan istripuan, gurpil pneumatiko batek eztanda egin zionean. Recacor enpresarentzat ari zen lanean gaztea. “Lan istripuak ez dira kasualitateak sortutakoak”, adierazi du LAB sindikatuko Oarso Bidasoko arduradun Kristina Getek, bilkuran izan diren sindikatuen izenean, HITZAra bidalitako oharrean.
ELA, LAB, ESK, STEILAS, EHNE eta HIRU sindikatuek deituriko elkarretaratzera hamarnaka lagun bildu dira. Bertan, sindikatuetako ordezkariak, nahiz EH Bilduko Lezoko zinegotziak eta Estitxu Elduaien koalizioko batzarkidea izan dira, besteak beste.
Getek nabarmendu du aurten gutxienez 30 pertsona hil direla Hego Euskal Herrian lanean edo lanaren ondorioz. Lanaren prekarizazioa eta lan baldintzen okertzea eman ditu horren arduradun, “bizi eta lan duinak behar ditugu. Lanetik onik eta bizirik bueltatzeko eskubidea izan behar dugu”. “Borroka eta antolaketa” eman ditu Getek “sarraski honekin bukatzeko” bidetzat.
Hein berean, elkartasuna eta babesa azaldu diete sindikatuek hildako langilearen senide eta gertukoei.
