Playoffera joateko autobusak San Pedrotik
Zaleek huts egin ez dezaten autobus bidaiak antolatuko ditu arraun klubak, hilaren 14 eta 15ean Bermeo eta Portugaletera joateko hurrenez hurren.
Klubak beti eskertu du zaleen jarrera txalogarria. Argazkia: Sanpedrotarra A.E. Bi aste barru Sanpedrotarra Arraun Elkarteak, eta atzetik dituen zaleak hil ala biziko estropada izango dute. Erronka, Eusko Label Ligako Playoffa izango da eta San Pedro bertan izango da, mailari eusteko asmoz.
San Pedro talde apala da, baina beti bezala, zaleek babesa emango diote Libiari. Ahalik eta zale gehien joan daitezen, San Pedrotik autobus bidaiak antolatuko dituzte.
Playoffaren lehen jardunaldia hilaren 14ean izango da, Bermeon. Zaleak eramango dituen autobusa, 15:00tan aterako da San Pedroko bus geltokitik. 10 minutu beranduago, Trintxerpen hartuko du jendea. Hurrengo egunean Portugaletera joango dira. Bidaia goizez izango da. 8:30tan abiatuko da San Pedrotik eta 8:40tan Trintxerpetik.
Egun bakarreko bonoak, izan Bermeo edo Portugaleteko estropadarako, 12 euroko prezio orokorra izango du eta 10 eurokoa bazkide zein laguntzaileentzat. Bi eguneko bono orokorra ordea, 20 euroan salduko da eta 18 euroan bazkide eta laguntzaileei.
Interesdunek zenbait lekuetan izena eman ahalko dute: San Pedroko Begihaundi tabernan, Sapedrotarra Arraun Elkartearen dendan (kofradia) eta Donostiako Amara Graphic dendan.
