Urriaren 5eko Dantzari Egunerako laguntza behar du Murixkak
Dantzari Egunean lagundu nahi dutenentzako zerrenda jarri dute Tiñelun. Hilaren 17ra arte eman daiteke izena. Mezu bidez ere apunta daiteke.
Iaz, Gasteizen egin zen Dantzari Eguna. Argazkia: Euskal Dantzarien Biltzarra. Urriaren 5ean egingo dute Lezon Euskal Herriko Dantzari Eguna, Murixka Dantza Taldeak antolatuta. Egun handia da, eta egunaren araberakoak dira zereginak eta lana. Hortaz, Murixkak laguntza eskatu die herritarrei, eguna behar bezala joan dadin. Boluntarioak behar dituzte.
Lagundu nahi dutenei deialdi zehatza egin diete: gaurtik (asteartea) hilaren 17ra arte zerrenda jarriko dute Tiñelun, bertan nahi dutenek laguntzaile izateko izena eman dezaten. 679 044 088ra deia eginez edo whatsapp mezua bidaliz eman daiteke izena (informazioa ere eskuratzeko aukera dago).
Handia ari dira prestatzen urriaren 5erako Murixkakoak. Euskal Herri osoko dantzariak iritsiko dira herrira, eta erromeria, animazio musikala, hitzaldiak, azoka… Egun betea izango da.
