[Galeria] Olinpiaden finalak eman dio hasiera Gazte Egunari
Haur bat galdu da taldeak irabazi ditu olinpiadak. Jarraian herri bazkaria egin dute lezoarrek arratsalde luze bati hasiera emanez.
Haur bat galdu da taldeak irabazi ditu olinpiadak Haur bat galdu da taldeak irabazi ditu 2019ko Gazte Olinpiadak. Izena nahiko xelebrea izan arren, serio aritu da kuadrilla eta ondorioz eguneko onenak izan dira. Gaurko lanari esker, hurrengo urteko Gazte Eguneko kamiseta doan jasoko dute irabazleek.
Bigarren postuan Kurrukuku-k bukatu du eta 10 gosari izango dituzte zain Taloka tabernan. Kinki Hools-ek osatu du podiuma eta haien saria, Tiñelu tabernan ahalko dituzte 10 garagardoak. Laugarren postuan, Rufinos 1-eko gazteak amaitu dute.
Dena dela, lehia zintzo eta jai giroa izan dira gaur nagusi, Piztu Lezo kolektiboak antolatuta, Gazte Eguna ospatzen ari dira eta. Herritarren arteko sareak eta harremanak sendotu nahi zituzten eta lortzen ari dira.
Olinpiadak amaituta argazki erraldoia egin dute parte hartzaileek eta jarraian, herri bazkariari ekin diote. Bakoitzak kamiseta urdina soinean zuela, gogotik jan dute gazteek auzolanean egindako bazkaria. Iñaki Labaka musikariak bazkalondokoa girotu du.
Ongi bazkalduta, arratsalde luzeari ekingo diote Lezoko gazteek. 18:00tan trikipoteoa egingo dute herrian zehar txosnatik abiatuta eta 23:00tan erromeria Trikidantz taldearekin. Santakrutzak hurrengo astea hasiko dira, baina jai giroak Lezo hartu du dagoeneko.
HITZA herri bazkarian izan da gaur, eta honako argazki hauek bildu ditu.
