Xabier Goienetxea Mont de Marsanera hurbildu dute
Fresnesko espetxean zegoen Goienetxea, Euskal Herritik 850 kilometrora.
Xabier Goienetxea Iragorri euskal preso oreretarra Mont de Marsango espetxera hurbildu dutela jakinarazi du Etxerat Euskal Preso eta Iheslarien Senide eta Lagunen Elkarteak jakinarazi duenez. Fresnesko espetxean zegoen Goienetxea, Euskal Herritik 850 kilometrora.
Mont de Marsan espetxea, duela 10 urte zabaldu zuten, eta Errenteria-Oreretatik 150 kilometrora dago. 2014z geroztik Frantziako Estatuko espetxeetan dauden euskal preso gizonek, espetxe horretara eramatea eskatu diote Parisi, izan ere, hori da Frantziako Estatuaren espetxeen artean Euskal Herritik hurbilen dagoena. Emakume modulurik ez da bertan.
2015eko uztailaren 7an atxilotu zuen poliziak Goienetxea beste hiru lagunekin batera Orbaitzen (Behe Nafarroa). Goienetxeari ETAko kide izatea egotzi zion poliziak.
Goienetxeak 2008an alde egin zuen jaioterritik, Espainiako poliziak, Fernando Grande Marlaskaren aginduz, Oarsoaldeko hogei bat gazte independentistaren aurkako operazioa egin zuenean. Urte hartako abenduan, agerraldia egin zuen beste hiru pertsonekin batera, erakunde armatuan sartzeko urratsa egingo zutela iragarriz.