Donibane Eskubaloiak haurrentzako eskubaloi eskola sortu du
Eskubaloiaren onurak ezagutaraztea eta gazte pasaitarrei herrian bertan eskubaloian jolasteko aukera ematea dute helburu. LH 5etik DBH 2ko gazteei dago zuzendua eta dagoeneko izena eman daiteke.
Gaurko eskolan etorkizuneko jokalariak sortzen hasi daitezke. Argazkia: Donibane Eskubaloia Formakuntza eskaintzari dagokionez, urrats handia emango du ikasturte honetan Donibane Eskubaloiak. Pasaiako gazteek eskubaloiarekin bat egin dezaten, eskubaloi eskola sortu du taldeak. Oraindik Kadete ez diren gazteei, entrenatzen hasteko aukera ematea da eskolaren helburua. Funtsean, harrobia handitu eta sendotu nahi dute.
Eskolak bi maila hartuko ditu, LH 5 eta 6ko haurrak alde batetik, eta DBH 1 eta 2koak bestetik. Mistoa izango da; neska eta mutilek eman ahalko dute izena eta berdintasunez arituko dira. Donibanez gain, Pasaiako beste barrutietara iritsi nahi dutelako, DBH1 eta 2ko neska mutilen entrenamenduak Antxon burutuko dira ere bai. Asteazkenetan Ibaiondo frontoiak hartuko ditu entrenamenduak, 16:00etatik, 17:00etara. Ostiraletan ordea Donibaneko kiroldegian izango dira, ordutegi berean.
LH5 eta 6ko gazteen saioak Donibaneko kiroldegian egingo dira besterik ez, ostiraletan 17:00etatik 18:00etara. Urrian hasiko dira entrenatzen.
Ostiralean aurkeztuko ditu Donibane Eskubaloiak aurtengo taldeak Santiago plazan 17:00etatik aurrera. Eskubaloi eskolaren inguruko informazio gehiago nahi izanez gero, taldeak postu bat izango du plazan bertan. Era berean, nahi dutenek han bertan eman ahalko dute izena, ala bertaratu gabe, taldearen helbide elektronikora idatziz.
