Gurasoak ere badoaz eskolara
Seme-alabekin, adin ezberdinetan sortzen diren beharrei erantzutea, heztea, eta hainbat egora kudeatzeko tresnak eskura jartzea du helburu Guraso Eskolak.
Itziar Ostolaza Hezkuntza zinegotzia, Errenteria-Oreretako ikastetxeetako guraso elkarteetako ordezkariekin. Seme-alabekin, adin ezberdinetan sortzen diren beharrei erantzutea, heztea, eta hainbat egora kudeatzeko tresnak eskura jartzea du helburu Guraso Eskolak. Errenteriako Udalak joan den ikasturtean jarri zuen martxan, eta horren barruan ikastetxe bakoitzaren beharretara egokitutako hainbat ikastaro burutu zituzten gurasoek. 2 eta 16 urte arteko seme-alabak dituzten gurasoei begirakoa da zerbitzua, eta ikastetxe guztietan eskainiko dute. Lehenengo hiruhilekoan, hiru saio eskainiko ditu Guraso Eskolak, lehenengoa urrian: Familia: komunikazio positiboa eta asertibitatea.
Beste bi saioak azaroa eta abenduan izango dira eta inkesta bidez familiek eskatutako gaien inguruan izango dira, Arazoak identifikatzeko estrategiak eta arazoz zehatzei aurre egiteko baliabideak, eta Internetaren arriskuak: teknologia berrien inguruko heziketa, hurrenez hurren.
Izena eman nahi dutenek saioaren aurreko egunera arte dute horretarako aukera Herri Biziaren bidez.
Aurten lehenengoz, guraso taldeak sortuko dituzte Haur Hezkuntzan ikastetxeetan. Itziar Ostolaza Hezkuntza zinegotziak atzo egindako aurkezpenean azaldu zuen moduan, “hilabetero bilduko dira guraso talde iraunkor horiek, beren kezkak eta beharrak asetzeko”.
Bakarkako arreta zerbitzua ere izango da. Espazio horrek egunerokotasunean sortzen diren hezkuntza, garapen, ikasketa eta erlazioen gaineko kezkak kudeatzen lagundu nahi ditu gurasoak.
Guraso Eskolaren gaineko informazio gehiago behar duten gurasoek erreferentziazko ikastetxera edo guraso elkartera jo dezakete. Guraso Eskolaren zerbitzuaren gaineko zalantzak argitu edota bakarkako arreta jasotzeko posta elektronikora mezua bidali daiteke, ostegunetan 15:00etatik 16:00etara, 656 785 890 telefono zenbakira deituta astearteetan 09:00etatik 12:00etara, edo gazteriaren webgunean kontsultatu.
