2020rako zerga eta tasa proposamena ostegunean aztertuko du Lezoko udalbatzak
Tasarik esanguratsuenak ez igotzea da udal gobernuaren asmoa. Beste hainbat egokitzeko asmoa dago. Osteguneko udalbatzarrean aztertuko dute.
Lezoko udaletxea. Lezoko udal gobernu taldeak 2020ko ordenantza fiskalen proposamena landu du. Ideia nagusi bat dute: udal tasa eta zerga gehienek igoerarik ez izatea hurrengo urtean, “udal gobernuak beti izan du helburu herritarren gaineko presio fiskala baretzen saiatzea, betiere gastu eta diru sarreren arteko oreka mantenduz eta bermatuz”. Ostegun honetan egingo den udalbatzarrean jarriko dute mahaiaren gainean proposamena, zinegotziek onar dezaten.
Proposamenaren arabera, Ondasun Higiezinen Gaineko Zerga, eta Jarduera Ekonomikoen Gaineko Zerga bere horretan mantentzea da asmoa. Eta uraren eta zaborrarekin tasetan ere ez dute igoerarik aurreikusi.
Salbuespenak badaude: Ibilgailuen Gaineko Zerga %1,5ean igotzea dago jasota proposamena (2015tik 2019ra izoztuta egon da), eta Eraikuntzen, Instalazioen eta Obren Gaineko Zerga egokitu nahi du udal gobernu taldeak. Azken horren kasuan, udal teknikariek egindako proposamenari jarraiki, erreforma mota ezberdinen kostu eta gastuen inguruko azterketa sakon bat egin ostean, erabateko eraberritzeetarako eta eraberritze partzialetarako oinarrizko balio batzuk ezarriko ditu udalak, eta lizentzia ematerako orduan, zerga balio horien arabera ordaindu beharko da. “Modu horretara, gobernu taldearen helburua da kudeaketa eta jarraipen zorrotzagoa egitea alor honetan”.
Hilerriko tasak ere egokitu nahi ditu udal erakundeak. “Hilerriko zerbitzuaren prezioak oso baxuak dira; zerbitzuaren erabiltzaile gehienek, ordea, aseguru etxe baten bitartez erabiltzen dute zerbitzua, eta horrenbestez, aseguru etxea da eta ez herritarra hilerriko prezio baxuen onuraduna. Horrenbestez, gobernu taldearen proposamena da aurrerantzean zerbitzuaren balio erreala aplikatzea eta asegururik ez dutenei edota behar duten herritarrei laguntzak eskaintzea Gizarte Zerbitzuetatik”.
Lezoko kiroldegiko bazkide ez direnei dutxa zerbitzua igotzea ere proposatu du, ematen den zerbitzua kostua baino altuagoa delakoan.
