Lezoko zazpigarren Garagardo Festa, ate joka
Lezoko Garagardo Festa ostegunetik larunbatera egingo dute Karlos Saldise plazan. Orotara 14 garagardo dastatzeko aukera izango da.
Iazko Gargardo Festan, Saldise plaza lepo beteta. Lezok zazpigarren Garagardo Festa jasoko du ostegunetik larunbatera (hilaren 26tik 30era). Tiñelu elkarteak antolatzen duen ekitaldia jada erreferentzia bihurtu da Lezoko herritarrentzat, eta kanpokoentzat. Karlos Saldise plazan izango du aurten ere erdigune. Ostegunean 18:00etatik 00:30era izango da zabalik; ostiralean berdin, 18:00etatik 00:30era; larunbatean zabalagoa da ordutegia, 18:00etatik 02:00etara.
14 garagardoko aukera osatu dute antolatzaileek, “horietatik gehienak kalitate gorenekoak”, adierazi dute Tiñelutik. Horri, jakiak erantsi behar, klasiko diren ukondo, saltxitxa eta bestelakoak.
Nola ez, animaziorik ez da faltako. Ostegunean Oktoberfest musika izango da (kirolaz gozatzeko aukera ere izango da, Realaren partida dago); ostiralean, Jaixkipe txarangak girotuko du jaigunea, eta larunbatean denetik: 20:30ean dantza saioa Out Of The Blue taldearekin; 21:00etan Amer eta Africa Envarekin zirkua; ; eta 23:00etan Sara Sweet Band taldearekin rock/blues doinuak.
Tiñeluk jakinarazi du orotara 140 boluntariok egingo dutela lan festa bitartean, euren laguntza eskertu diete. Eta Lezoko nahiz eskualdeko biztanleak bertara daitezen animatu dituzte.
