Arretxeneko konposta gunean berrikuntzak egin ditu udalak
konposta kutxak edukiera handiagoa duten kutxa berriekin aldatu ditu, "konposta guneko erabilera erraztu, antolaketa optimizatu, eta konposta bera hobetzeko".
Andreone atzeko auzokonposta gunea. Arretxene-Txulotxoko konposta gunean berrikuntzak egin ditu udalak: konposta kutxak edukiera handiagoa duten kutxa berriekin aldatu ditu, “konposta guneko erabilera erraztu, antolaketa optimizatu, eta konposta bera hobetzeko”. Zehazki, 300 litroko edukiera zuten hogei kutxak 700 litroko edukiera duten sei kutxengatik ordezkatu ditu. Konposta kantitate edota dimentsio handiagotan egitean, tenperatura altuagoak lortzen dira eta ondorioz, organikoan dauden patogenoak hil eta konpostaren kalitatea hobetzen da udalaren esanetan: “Konposta kutxa gutxiago izateak halaber, kudeaketa erraztuko die erabiltzaileei eta teknikariei”.
Arretxene-Txulotxoko hamazazpi familiek egiten dute auzo konposta. Kutxa aldaketarekin. familia gehiagok izango dutela lekua zehaztu du udalak, “·kutxa berriak hiru taldeetan banatuko dira A, B eta C. Talde bakoitzean sei-zazpi familiek hartuko dute parte, eta bi konposta kutxa izango dituzte: materia organiko freskoa botatzeko bata, eta heltzen ari den konpostarena bestea”.
Hondakinen %40a inguru organikoa dela azaldu du udalak, eta auzo konpostaren bidez modu iraunkorrean tratatu daitezkeela, “herrian bertan kudeatuz, eta inolako kutsadura eta albo poluziorik eragin gabe”.
Bost urte darama martxan auzo konpostaren programak Lezon, eta egun 68 familiek egin dute bat. Bost gune daude halaber, Altamira, Arretxe-Txulotxo, Aralar, Andreone, eta Lopene. Bostetan tokia dagoela jakinarazi du udalak, eta auzo konposta egin nahi duten herritarrak udalarekin edo aholkularitza teknikoarekin harremanetan jar daitezkeela esan du, posta elektroniko bidez edota 647 057 402 telefono zenbakira whatsAppa idaztita.
