Bego Lazkano eta Xabi Ruiz palistek txapela jantzi zuten igandean
Donostia Kayak taldeko palista pasaitarrek txapela bana jantzi zuten senior kategorian, Elantxobetik Lekeitiorako bidea egiten zuen proban. Pasaia Kayak lehen postuan jarraitzen du Euskadiko Kopan.
Irudian Bego Lazkano Santa Katalinako muturrean, lehiakide baten olatura. Pasaiako bi piraguista izan ziren garaile aurreko igandean egindako itsas kayakeko XV. Euskadiko Kopan, bakoitza, bere kategorian. Donostia Kayak taldeko Bego Lazkano eta Xabi Ruiz palista bikainek erakustaldi aparta eman zuten. Igandekoa, ez zen edonolako proba izan; 13 kilometroko ibilbidea Elantxobetik Lekeitiora, itsaso zabalean.
Lehia biziko probak izan ziren biak, nahiz eta itsasoa iragarrita zegoena baino bareago egon. Olatuak eta korronteak baliatzeko aukerarik gabe, palista indartsuen proba izan zen igandekoa. Lazkano eta Ruiz ederki egokitu ziren, egunak eskainitako baldintzetara.
Lazkanok nagusitasun osoz irabazi zuen eta sasoi betean dagoela frogatu zuen. Ez zion aukerarik eman Pasaia Kayakeko Amaia Benavente errenteriarrari. Donostia Kayaken taldekideak izandakoa dira Benavente eta Lazkano. Maila altua erakutsi zuen pasaitarrak, kategoria guztietako zenbait gizon ere atzean utzi baitzituen.
Lehia askoz ere estuagoa izan zen gizonezkoen proban. Ruizek uneoro gertu izan zituen Barrikako Lauzirika, eta Pasaia Kayakeko Lander Rodriguez, baina senior mailako lehen postuari eusteko gai izan zen. Dena dela, aipatu beharra dago, Ruizen aurretik beterano mailako Villagarciak zeharkatu zuela helmuga.
Taldekako sailkapenean Pasaia Kayak 3. postuan bukatu zuen eta bildutako puntuei esker, lehen postuari eutsiko diote pasaitarrek Euskadiko Koparen sailkapen orokorrean. Aise nagusitzen ari da aurten Pasaia Kayak, 697 puntu ditu. Atzetik Donostiako Fortuna eta Zumaiako Itxas-gain, 307 eta 301 punturekin hurrenez-hurren.
