Errimak josten hasteko prest da, berriz ere, Xenpelar Bertso Eskola
Gazteei begirako bederatzi talde izango ditu aurten Errenteria-Oreretako bertso eskolak; horiekin batera, bat batean aritzeko taldea ere osatu du Xenpelarrek.
Santa Ageda egunean koplak abesten arituko da Xenpelar Bertso Eskola aurten ere. Uda sasoia bukatuta eta oporraldian atseden hartuta, indarrez eta lanerako prest dator ikasturte berrian Xenpelar Bertso Eskola. Datorren astean zabalduko ditu ateak Lau Hazietara Euskaltzaleon Topagunearen egoitzan, eta gazteenen zein helduenen bertso gosea aseko du.
Gazteei begirako bederatzi talde izango ditu aurten Errenteria-Oreretako bertso eskolak, eta ez dute lan makala izango astero errimak josten. Horiekin batera, bat batean aritzeko taldea ere osatu du Xenpelarrek. Eta hain serio aritu nahi ez dutenek ere izango dute lekua, izan ere, bertso eskolak, lagun artean aritu eta bertsolaritza jolastzat hartzen dutenen beste taldea ere martxan izango duelako ikasturte berriarekin batera.
Arka Hitzak egitasmoa
Bertso eskolak ematen dituzte, baina ez da horretara mugatzen Xenpelar Bertso Eskola, eta urtean zehar hainbat bertso saio, lehiaketa, jai giroko emanaldi eta egitasmo egiten dituzte bertsolaritzaren mundua herritar guztienagana gerturatzeko.
Horien artean, iaz martxan jarritako Arka Hitzak egitasmoarekin jarraituko dute aurten ere. Lehenengo saioa urriaren 11n izango da, ostiralarekin, Arkaitza tabernan. Egitasmoaren izenak azaltzen duen bezala, Arkaitza du eremu naturala bertsolaritza iniziatiba horrek. Gainerako saioak berriz, leku berean noski, hileko bigarren ostiraletan egingo dituzte, guztiak 23:00etan hasita. Zaleei beraz, hilabetero gozatzeko aukera paregabea eskainiko die.
Bertso eskolako arduradunek «ilusioz gainezka» datozela nabarmendu dute. Deialdi berezia egin diete helduen taldeetan izena eman nahi dutenei: urriaren 4an 19:00etan Lau Haizetararen egoitzara deitu dituzte.
Urtean zehar, Zapirain Anaiak eta Ibon Zabala bertso paper lehiaketak, eta urteroko Santa Ageda koplak ere antolatuko dituela, besteak beste, ekarri du gogora bertso eskolak.
