[Galeria] Sutea berriro Lekuonan
15:00ak aldera sutea piztu da Lekuona eraikinean. Suhiltzaileen lau kamioi bertaratu dira eta lanean ari dira sutea menpean hartzeko. 17:00etarako itzalita zegoen sutea.
Sutea Lekuonan. 15:00ak aldera sutea piztu da Lekuona eraikinean. Suhiltzaileen lau kamioi bertaratu dira eta lanean ari dira sutea menpean hartzeko, eta 16:30ean jada itzalita zegoen. Kalte pertsonalik ez da, baina langile bat artatu behar izan dute bertaratu den anbulantzian kea arnastu ondoren. Kalteen balorazioa egiten ari dira.
Suhiltzaileekin batera, Udaltzaingoa eta Ertzaintza izan da bertan lanean. Aizpea Otaegi alkatea eta EH Bilduko Itziar Ostolaza eta Alazne Korta zinegotziak; Elkarrekin Podemoseko Jose Manuel Ferradas zinegotzia eta Ion Collar Kultura ordezkaria berehala gerturatu dira Lekuonara. Otaegi kea arnastu duen langilearekin hitz egiten izan da anbulantzian, eta ezbehar pertsonal larririk ez egon izana garrantzitsuena dela esan du. Ez du bestelako adierazpenik egin, eta sutea kontrolpean izan eta lehen balorazioak izan arte itxarongo dutela jakinarazi du.
Duela hiru hilabete sutea piztu zen Lekuonan. Soldatze lanetan zebilen langile bati txinpartak plastikoa eta pladurra zegoen eremura ihes egin zion, eta horrela sortu zen sutea. Ziurtatu ez badute ere, badirudi gaurkoa ere soldatze lanetan ari zirela gertatu dela, eta aurreko sutea izan zen eremutik gertu.
Udalak agerraldia egingo du bihar goizean Lekuona eraikinaren kanpoaldean. Kalteen gaineko balorazioa egingo dute agerraldi horretan.
