Online jarriko dituzte herritarrak
Udal tramiteak etxetik eta modu errazean egiten ikasteko formazioa eskainiko dute udalak eta KZ Guneak elkarlanean.
Ortiz eta Gracia KZ Gunean ikastaroaren berri ematen. Udal tramiteak etxetik eta modu errazean egiten ikasteko formazioa eskainiko dute udalak eta KZ Guneak elkarlanean. Hala jakinarazi dute gaur eguerdian Eñaut Gracia Ibarrak Informazioaren Gizarterako zinegotziak eta Berex Ortiz Ardanzak KZ Gunearen koordinatzaileak. Udal web orri nagusia eta oinarri duen sistema teknologikoak aukera ematen duela hainbat tramite etxetik egin ahal izateko azaldu du Graciak, “zentzu horretan eta herritarrek tramiteak online egiteari beldurra gal diezaioten antolatu ditu doako kurtsoak udalak KZ Gunearen laguntzarekin”.
Ortizek ikastaroaren helburua Errenteriako Udalarekin tramiteak online moduan nola egin daitezken irakastea dela azaldu du bere aldetik. Euskaraz eta gazteleraz egingo dituzte formazio saioak, eta hezitzaileek ikastaroa aurrez aurre emango dute Moodle plataforma erabiliz, “teorikoki azalduko dira kontzeptuak baina gero ikastaroan azaltzen den p ere egiteko aukera emango da”.
Hala, errenteriako Udalarekin harremanetan jartzeko bideak erakutsiko dituzte eta udalaren webgunearen atalak eta edukiak zeintzuk diren ikusiko dute. Horrekin batera, internet bidezko tramiteak zer horiek gauzatzeko BakQ sistemaren funtzionamendua ere irakatsiko dute formatzaileek. Herri Biziaren mugikorretarako aplikazioaren edukiak eta funtzionamendua ere aztertuko dituzte, eta azkenik, interneten modu seguruan aritzeko aholkuak emango dituzte.
Ikastaroa aurrez aurre emango dute, baina bertaratu ezin dutenentzat internet bidez ere izango da aukera formazioan bildutako materiala ikusteko. Horretarako, KZ Gunearen webgunera jo behar dute interesdunek.
Ikastaroa berria da, eta KZ Guneak dituen doako ikastaroen katalogoan txertatuko du.
Ongi konektatutako herria sortu
Ikastaroari testuingurua eman dio Graciak, eta Errenteria 2025 Plan Estrategikoari erreferentzia egin dio: “Plan horrek bere egiten duen lan ildoetako bat ongi konektatutako herri bat sortzea zen. Erronka horrek, udalaren antolaketa eredua eta sistema telematikoa, eta informazioa erakusteko zuen modua birpentsatzea suposatu zuen.
Hausnarketa horretatik abiatuta, udalaren web ekosistema eta identitate digitalaren normalizazio eta homogeneizazio prozesua abiatu zen”. Horren adibide garbiena udalaren webgune nagusia dela erantsi du, ” indar gehiena bertan jarri dugu eta teknologia libreetan oinarritzen da. Boston eta Bartzelona bezalako hirietan inspiratuta dago eta intuizioa eta erabilgarritasuna ditu ardatz; edozein lekura erraz iristea du helburu”.
Filosofia horretatik abiatuta eta herritarrei informaziorako irisgarritasuna errazteko helburuz antolatu direla ikastaroak erantsi du.
Ikastaroan parte hartu nahi dutenek izena eman behar dute KZ Gunean.
