Txingurri errekaren saneamendua osatu gabe dagoela ohartarazi du Eguzkik
Asteartean Trintxerpeko kaiko urak zuriz tindatu ziren, Txingurri errekan egindako isuri kutsakor baten ondorioz. Donostiako Altza, Larratxo eta Herrera auzoetako ur zikinak Pasaiako Portuan botatzen ditu errekak.
Portu Agintaritzak barrera bat jarri behar izan zuen, isuria zabaldu ez zedin. Pasaiako portuan beste isuri kutsakor bat izan zen asteartean. Oraingoan Trintxerpeko kaian izan zen eta hainbat orduz, urak zuri kolorea hartu zuen. Egoeraren larritasunaren aurrean, Pasaiako Portu Agintaritzak neurriak hartu zituen, isuria gelditzeko ur barrera bat jarriz. Pasaiako portuan berriz ere, ingurumen araudiari muzin egin diotela salatu du Eguzki Talde Ekologista eta Antinuklearrak.
Arduradunek esandakoaren arabera, ezinezko omen da egiaztatzea non izan zen isurketa zehatz-mehatz, baina argi dago Txingurri errekak eraman zuela badiara. Erreka txikia izan arren, populazio handia duten hiru auzoren ur zikin asko biltzen ditu. Donostiako Altza, Larratxo eta Herrera auzoen ur zikinak beraz, Txingurri errekaren bitartez Trintxerpeko kaira iristen dira. Porturatze gunean izanda gainera, uraren kalitatea ez da ona Trintxerpen. Txingurrik egoera okertu baino ez du egiten.
Trintxerpekoa, badian saneamendurik gabe jarraitzen duen guneetako bat baino ez da. Talde ekologistek luzaz salatu dute, Donibanen ur-hondakinen araudia ez dela errespetatzen, eta ondorioak larriak izan daitezkeela. Euskal Autonomia Erkidegoko Uren Kalitatearen Jarraipen Sarearen azken txostenak, hiru gune kritikoren berri ematen du Pasaiako badian; Trintxerpe, Donibane eta Oiartzun ibaiaren bokalea. Eguzki taldeak azaldu duenez, Trintxerpek ur kalitaterik txarrena, bereziki Txingurri erreka bertan isuritako ur zikinak direla eta. Ikerketaren arabera, aipatutako hiru tokietan uraren kalitatea txarra da.
Asteartekoa, kolore zuridun orbana zabaldu zelako, izan zuen oihartzuna, baina Txingurri errekaren isuriak, uste baino ohikoagoak dira. 2007 eta 2008 urteetan, garrantzizko saneamendu lanak egin zituzten hondakin-uren kopurua murrizteko. Dena dela, Altza, Larratxo eta Herrerako zonalde askoren ur zikinak, Txingurrira iristen jarraitzen dute.
Pasaiako badian legez kanpoko isuriak egitea, merke ateratzen dela diote ekologistek izan uretan ala airean. Behin baino gehiagotan salatu dute erabateko zigorgabetasuna dagoela Pasaiako Portuan, eta noizean behin horrelako kasuak ematen direla, inolako ondoriorik gabe.
