Portuan egindako deskargetan ingurumen araudia bermatzea eskatu du Izaskun Gomezek
Portuko Agintaritzaren Administrazio Kontseiluaren bileran, zamaontzien deskargak ingurumena babesteko neurririk gabe gabe egiten direla salatu zuen alkateak.
Zamaontzien materialak sarritan kutsatzen dituzte inguruko auzuneak. Argazkia: Eguzki Talde Ekologista Aurreko ostegunean egindako Pasaiako Portuaren Administrazio Kontseiluaren bileran kexu agertu zen Pasaiako alkate Izaskun Gomez, portuan egindako deskarga desegokien harira.
Argudio sendoekin joan zen Gomez bilerara, argazkiak eraman zituen eta. 2019. urtean horrelako egoerak ematea onartezina dela esan zuen eta gutxieneko neurri batzuk bermatzea eskatu zien Portuko Agintaritzako lehendakariari eta kontseilariei.
Hitzetik ekintzetara igarotzea beharrezkoa dela esan zuen Pasaiako alkateak, “konpromisoak hartzea ez da nahikoa. Adostutakoa ekintza zehatzekin islatu behar da”. Kudeaketa arintzeko, Gomez prest agertu zen elkarlana estutzeko, baita baliabide gehiago jartzeko ere.
Pasaiako Portura iristen diren zamaontzi ugarik, material kutsakorrak ekartzen dituzte. Zama horiek deskargatzeko protokolo jakin batzuk daude, bereziki hautsezko materialak. Ingurumen araudia baina, maiz urratzen dute portuan jarduten duten enpresek.
Abuztu amaieran, Pasai Antxo eta Donostiako Buenavista auzoen artean deskarga baten ondorioz gertatutako kutsadura kasua salatu zuten talde ekologistek eta bizilagunek. Horrelakoak ohikoak direla ohartarazi zuten, eta inguruko erakundeei neurriak hartzea exijitu zieten, ingurumen araudia errespetatze aldera.
