[Galeria] Mikel Izagirre Anabitarte: berritzailea eta ilusioz betea
Mikel Izagirre omendu dute gaur Errenteria-Oreretan. Kirol egokituari, eta oro har gizarteari egin zien ekarpena balioan jarri dute.
Bete egin da Niessen omenaldirako. Mikel Izagirre Anabitarte omentzeko eguna da gaurkoa. Uztailean hil zen. Gaur, Errenteria-Oreretako Niessen Kulturgunean egindako ekitaldian hark egindako lana aitortu dute. Bete egin da Niessen. Merezitako omenaldia jaso du. 2012an Mindara elkartearen sortzaileetakoa izan zen Izagirre. Bertan zeuden elkarteko familiak.
Ekitaldian Izagirreren baloreen eta jarduteko eraren adibide asko azaldu dituzte. Bi nabarmendu dira: ikuspuntu berritzailea, eta ilusioz gainezka egindako lana. Eta horiek aurrera eramateko hiru lanabes zituen: adorea, kumunikatzeko gaitasuna, eta etorkizun sena.
Kirol egokituaren alde egindako lanagatik batez ere izan da ezaguna Izagirre. Nork pentsatu behar zuen 1983. urtean, Behobia-Donostia lasterketan atleta elbarriak aterako zirela? Bada Izagirrek egindako lanari esker, egun normala da (eta 1983an pentsaezina) gurpildun aulkiekin lehian ikustea kirolariak, Behobian eta beste edonon. Mahai tenis, saskibaloi, pilota egokituan sasoi betean lan egindakoa izan zen Izagirre, eta besteak beste, Juven saskibaloi taldea sortu zuenetakoa izan zen: 2001ean, erretiratu berritan, Gipuzkoako Kirol Egokituko Federazioa sortu zuen (10 urtez bertako presidente izan zen) Lucia Figueroarekin batera.
Bere bizitzan asko egindakoa izan zen Izagirre. Oroitarazi dute herritarrekin harreman zuzenena frantses eskolak ematen (1975-1986) eta ONCEko saltzaile zela (1986-2001) izan zuela, baina ordutik aurrera ere beti besteen aldeko zereginean, batez ere elbarritasunen bat zuten pertsonen ongizatean lanean jardun zuela. Horren beste adibide batzuk: kirol egokituan egindako lanaz gain, Donostiako Hegalak zentroa Izagirreren (besteren artean) ekimenez egin zen (2012an zabaldu zuten), Oñatiko udaleku egokituen sorreran parte hartu zuen, eta 2012an, Mindara hezur-mamitzeari ekin zion buru-belarri.
Gaurko ekitaldian, besteren artean, Lucia Figueroa bera izan da. Hunkituta egin du bere interbentzioa. Lanean entusiasta, gauzak bihotzetik egiten zituen horietakoa izan zela Izagirre esan du. Hura ezagutzea, ilusioz kutsatzea zela.
