EH Bildu izan da alderdi bozkatuena Pasaian
Koalizio independentistak irabazi ditu hauteskundeak. EAJ eta PSE-EE bigarren eta hirugarren izan dira hurrenez hurren. Elkarrekin Podemosek behera egin du nabarmen.
Hautesleku baten irudia Antxoko azokan. EH Bildu izan da alderdi politiko bozkatuena Espainiako Gorteetarako hauteskundeetan Pasaian. Atzetik, EAJ, PSE eta Elkarrekin Podemos geratu dira. Parte hartzea bestalde, %64koa izan da. Lau alderdi hauek pilatu dituzte beste behin boto gehienak, baina apirileko hauteskundeekin alderatuta, egoera politikoa irauli egin da Pasaian.
Parte hartzeak behera egin duen arren, EH Bilduk gora egin du boto kopuruan, 19 hain zuzen ere. EAJk boto gutxi batzuk galdu dituen arren, bigarren postuari eutsi dio Pasaian. PSEk ere behera egin du, baina hirugarren alderdi bozkatuena izatea lortu du. Elkarrekin Podemosek ordea beherakada nabarmena izan du, kasik 400 boto galdu ditu eta lehen postutik laugarrenera jaitsi da. Dena dela, lau alderdien arteko tartea, nahiko estua izaten jarraitzen du, denak kokatzen baitira 1500 eta 2000 botoen artean.
Espainiako alderdi eskuindarrek babes eskasa izan dute Pasaian. Baina nabarmentzekoa da, VOX alderdi ultraeskuindarrak gora egin duela berriz ere, 36 boto gehiago lortu dituzte. PPk ere emaitzak hobeto ditu.
Alderdiak Kongresurako botoak (parentesi artean apirilekoak)
- EH Bildu…………………………. 1963 (1944)
- EAJ…………………………………. 1846 (1.951)
- PSE-EE……………………………. 1727 (1897)
- Elkarrekin Podemos…………. 1578 (1956)
- PP…………………………………… 413 (380)
- VOX………………………………… 145 (109)
- Cs……………………………………. 76 (205)
- Pacma……………………………… 70 (100)
- RC-GV…………………………….. 18 (14)
- Aulki Zuriak…………………….. 15 (14)
- Bidezko Mundurantz………… 13 (11)
- ELAK………………………………. 12 (10)
