Giza Eskubideen Aldeko jardunaldiak egingo dituzte bosgarrenez
Erakusketak, hitzaldiak, eta zineforumarekin jantzi dituzte giza eskubideen aldeko jardunaldiak, eta herritar guztiak deitu dituzte parte hartzera, eta garrantzitsua dena, giza eskubideen bermatzaile aktibo izatera.
Antolatzaileetako batzuk gaurko agerraldian, Lanpedusa mosaikoaren aurrean. Giza Eskubideen Aldeko Jardunaldien bosgarren ekinaldia egingo dute Errenteria-Oreretan hilabete honetan eta abenduan zehar, hilaren 19a eta abenduaren 13a artean, zehazki. Bi lelo izango ditu aurtengoak: Izan zaitez giza eskubideen aktibista eta Giza eskubideen defendatzaileen defentsan. Lehenengoak, herritarrei eman nahi die lekukoa norbanakoak inplika, izan dezaten paper aktiboa giza eskubideen gaian; bigarrenak, munduan barrena giza eskubideen defendatzaile direnak babesteko, defendatzeko deia da. Giza eskubideen defendatzaile horietako bati aipamen berezia egin diote antolatzaileek gaur Lampedusako mosaikoaren aurrean egin duten prentsa agerraldian: Juanmi Gutierrez zinemagilea. Pasa den otsailean hil zen Gutierrez, eta bere lanean gai sozialekiko sentsibilitatea eta bizi konprometitua utzi dituela nabarmendu dute. Aipamen berezia egingo diote aurtengo jardunaldietan, baita merezitako omenaldia ere.
Besteak beste, Tabula rasa (2004), Bozes Lexanas (2005), Zuzendu mesedez! ¡Enfoquen por favor! (2008), Musika plaza (2010), Mur-mur (2012), Ateak zabalduz (2014), Urak dakarrena (2015), Oihalak aldarretan (2016) eta Baules (2018) ikus-entzunezkoak egin zituen. Bere filmografia erabilita gai ezberdinak jorratuko dituzte jardunaldien barruan; besteak beste, okupazioa, migratzaileak eta harrera sareak, edo aminatoaz arituko dira zineforum horien barruan.
Jose Ramon Gurrutxaga Txokolo Aniztasuna azpisailaren zinegotziak, Aitor Oiartzabal Aniztasun teknikariak, GOT Grupo Oarso Taldea, Emakumeen Etxea, Stop kaleratzeak, eta ASVIAMIE Amiantoaren Biktimen Euskal Elkarteko ordezkariek hartu dute parte gaurko agerraldian, hala ere, eragile gehiago daude inplikatuta jardunaldien antolaketan: Aurrekoekin batera, Ozzinema, Arrats, Zazpi térdi, Mundubat, Mikelazulo, Txintxarri, Fatima Parrokia, Irun, Donostia eta Iparraldeko Harrera sareak.
Herri Babes sareko kide
Joan den hilabetean errenteriako Udala Mundubat Elkarteak dinamizatzen duen Nazioarteko Herri Babes sarearekin bat egin duela azaldu du Gurrutxagak: “Sare horrek mundu osoan zehar dauden giza eskubideen defendatzaileek egindako lanketa babesten du, eta bertara atxiki izanak arlo horretan urrats bat aurrera egitea suposatzen du. Finean, munduan barrena dauden giza eskubideen defendatzaileak eta bertakoak elkarrekin izateko aukera izango dute”. Sare horrek, sentsibilizaziorako, komunikaziorako eta elkarlanerako udalek egindakoa koordinatzea du helburu, ondorio politikoak izan ditzan eta horrela giza eskubideen defendatzaileen babesa sustatzea.
Jardunaldien barruan, hilaren 20an, harrera instituzionala egingo zaie Guatemala , Kolonbia eta Saharako defendatzaileei, “beraiek eskatzen dutena babes politikoa da—azaldu du Gurrutxagak— normalean erakunde handiek ematen dute babes hori, baina guk uste dugu herrietatik ere, udalak busti behar direla”. Urtean zehar aukera izango dela ikastetxeetan solasaldiak egiteko gaineratu du.
Une honetan Herri Babes Sarean Euskal Herriko zortzi herrik hartzen dutela parte zehaztu du Gurrutxagak.
Gutierrezen filmografiarekin zineforumak antolatzeaz gain, jardunaldien barruan bi hitzaldi nabarmendu ditu Gurrutxagak: “Manuel Delgado arte historialaria eta antropologoa izango da eta berak oso ikuspuntu kritikoa du hirien antolaketaren eta konfigurazioaren gainean, espazio publikoa eta pribatua zer den argituko du. Bestalde, Brigitte Vasallo Kataluniako idazlea izango dugu; feminista eta arrazakeriaren aurkakoa da”.
Erakusketak, hitzaldiak, eta zineforumarekin jantzi dituzte giza eskubideen aldeko jardunaldiak, eta herritar guztiak deitu dituzte parte hartzera, eta garrantzitsua dena, giza eskubideen bermatzaile aktibo izatera.
Egitaraua
- Hilak 19, asteartea: Manuel Delgado Ruizen eskutik Espazio publikoaren eta pribatuaren nozioak eskubide gisa hitzaldia Reina aretoan 19:00etatik 21:00etara. Gazteleraz.
- Hilak 20, asteazkena: Herri babes sareari harrera instituzionala 16:00etatik 18:00etara Merkatuzarren. Herri Babes Sareko Giza Eskubideen defendatzaile hauek hartuko dute parte: Guatemalako Ana Rosalia Tiul, Quib de Caal, Comite de Unidad Campesina; Kolonbiako Leyla Andrea Arroyo Muñoz, Comite del paro civico de Buenaventurako ordezkaria; eta Giza Eskubideen Urraketako Biktimen Saharako elkarteko ordezkariak.
- Hilak 20, asteazkena: Juanmi Gutierrezen Musika plaza amiantoaren kalteen gaineko dokumentalaren proiekzioa eta ondoren osasunerako eskubidearen alorreko elkarteekin solasaldia: ASVIAMIEko Jexux Uzkudunekin. Fatima Andra Mariaren parrokian, 19:00etik 20:30era.
- Hilak 26, asteartea: Juanmi Gutierrezen Ateak zabalduz okupa mugimenduaren gaineko dokumentalaren proiekzioa eta ondoren Stop kaleratzeak eta etxebizitza eskubidearen gaineko elkarteekin solasaldia. Niessen zinemetan, 19:30etik 21:00etara.
- Hilak 27, asteazkena: Brigitte Vasalloren eskutik Feminismo Intersekzionatua hitzaldia, Merkatuzarren 19:00etatik 21:00etara, gazteleraz.
- Abenduak 2, astelehena: Juanmi Gutierrezen Paseko txoriak Errefuxiatuen eta herri solidario baten gaineko dokumentalaren proiekzioa, eta ondoren Irungo Harrera Sarearekin solasaldia. Niessen zinemetan, 19:30etik 21:00etara. Elebitan.
- Abenduak 4, asteazkena: Hiritarron harrera sarea, Irungo Harrera Sarea, Iparralde Etorkinekin eta GOTT elkarteekin solasaldia. Reina aretoan, 19:00etatik 21:00etara. Elebitan.
- Abenduak 10, asteartea: Juanmi Gutierrez zinema zuzendariari omenaldia. Niessen auditorioan 19:00etatik 21:00etara. Elebitan.
- Abenduak 13, ostirala: Miren Garcia Torresekin bisita gidatua, 12:00etatik 13:00etara. Elebitan.
- Hilaren 26tik abenduaren 13ra: Erakusketa, Eskubideak defendatzen bizitzea; hogei kontakizun grafiko giza eskubideen defentsan. Mexiko, Honduras, Guatemala, Kolonbia eta Palestinan bildutako hogei esperientzia. Xenpelar Etxean.
