Auzoak 'hackeatzera' deitu dute APPAGazte! aplikazioa erabiliz
Gazte eta nerabeekin harremanak estutze aldera, APPAGazte! aplikazioa ezagutzera eman dute Pasaiako Udaleko hainbat sailek. Bihar arratsaldean Antxo 'hackeatuko' dute.
Bihar 18:00tan Pasai Antxo 'hackeatzera' deitu dute APPAGazte!-ko sortzaileek. Bihar arratsaldean aurkeztuko da Pasai Antxon APPAGazte!, herriko gazteei Pasaian gertatzen ari denaren berri emango dien aplikazioa. Helburua, gazteen eta udalaren arteko harremana estutzea da, ezaguna eta erakargarria zaien formatu baten bitartez.
APPAGazte! elkarlanaren ondorio da, Pasaiako Udaleko Haurren eta Nerabeen Eskubideen Saila, Migrazio eta Aniztasun Saila eta Haur, Nerabe eta Gazteen Sustapen Saila dira aplikazioaren sustatzaileak, eta ongi etorri, gazte! programaren barruan kokatzen da egitasmoa.
APPAGazte!-ren bitartez, Pasaiako lau barrutiek eskaintzen dituzten baliabideen —kirola, kultura, hezkuntza, etab.— berri izan ahalko dute, bost hizkuntzetan, Pasaiako gazteen aniztasunari erantzun ahal izateko. Euskaraz, gaztelaniaz, frantsesez, ingelesez eta portugesez erabili ahalko da APPAGazte!
Informazio iturri izateaz gain, hezkuntzarako tresna ere izango da, teknologia berri eta sare sozialen erabilera arduratsua sustatzen baitu. Helburu horri jarraiki, ahalduntze digitalerako tailerrak programatu dituzte, besteak beste, Pasaiako ikastetxeetan
Auzoa ‘hackeatu’
Bihar 18:00tan Pasai Antxo ‘hackeatzera’ deitu dute APPAGazte!-ko sortzaileek. Berez, aplikazioa beraren azterketa praktikoa izango da; era aktibo eta dibertigarrian Antxok eskaintzen dituen baliabide eta eragileak ezagutuko dituzte. Ekintza 12 eta 17 urte bitarteko gazteei dago zuzendua eta Pasai Antxoko Gaztelekuan egingo da.
